港島區上個禮拜共錄得25宗商舖買賣，中環就佔咗9宗，都咪話唔驚人。新近一宗係閣麟街四十六號地舖，約1300方呎，連租約，作價2000萬，每呎過萬五蚊。租客係西餐廳，月租8萬，計落回報四厘八，算合理。 中原香港舖位部營業董事徐康達話，去年中，租呢個舖位嘅食肆，一個月租金5.7萬，年中約滿搬走，好快就畀𠵱家嘅西餐廳租咗，租金足足升咗四成幾。 上個禮拜兆安李太至用2000萬，買咗伊利近街37號地下連閣樓舖，睇落中環商舖市道應該仲有得玩。