經常出鏡嘅證券評論員劉仲坤在「時富集團」服務多年，由分析師至基金經理，往往被視為「時富嘅發言人」。劉仲坤係鑽石王老五，四十幾歲，仍然獨身，講股票甚為踏實，絕不吹牛吹過龍，自有一批擁躉。
最近知道，劉仲坤要轉工去UBS（瑞銀）做私人銀行部嘅投資顧問，時富立即挖角，搵姚浩然與陳蓓敏加盟，當知道現時股市交易額夠大，知名度高嘅分析師唔怕搵工跳槽。
以往外資大行只鍾意請美國英國名校學生做分析師，由低做起，自己培養人才，甚少向華資證券行挖角嘅，外資行與華資行素來河水不犯井水，點解現在情況有變？問分析師W，佢話：「外資行有三大客戶對象，其一係對沖基金，其二係傳統基金，其三係私人銀行部啲個人客戶，個人客戶之中，唔少係中國大陸人士，佢哋調錢嚟香港，買國企股票隨時億億聲咁買，點到銀行唔重視。派過一般RM（RelationshipManager）去服侍大客，未必冧得住，因為內地大客普遍年紀在四十或以上，唔輕易相信經驗不足嘅年輕人。呢，做過分析師、基金管理，對市場動態好熟，能講普通話（聽得明嗰隻，唔使字正腔圓），而年紀在四十五歲或以上嘅，對呢類客戶特別煞食，起碼一見面就唔會產生抗拒感，易傾好多。」
怪不得。俗語話中年發福，講中年人容易肥，現在講中年發福，福即是有福、有錢咁意思。除咗劉仲坤轉去瑞銀之外，另一位分析界老友亦已轉去瑞信，做同樣工作。分析師W笑佢哋中年發福，以後十年大把機會搵真銀，如果市場就手，分花紅都分到笑。
佢哋入咗外資大行，就唔可以隨便公開發言，大行嘅客戶先有資格聽。點至可以有資格呀？好易啫，中國有大把人合資格，搬十球美金去開個戶口咪得囉。花旗集團調查到嘅「百萬富翁」，去理財中心排吓隊啦。