香港管理專業協會每年都辦「傑出推銷員獎」選舉，今年第三十八屆，名單剛公布，又成為地產代理公司鬥一番嘅機會。幾大代理行都齊齊講吓自己公司嘅威水成績。
第一樣鬥嘅係攞獎前線數目。美聯先贏一仗，有五個前線得獎，美記話為咗培訓呢幾個精英，專登請咗企業人才培訓導師黃桂林親自教授。原來今次係美聯參賽以嚟最多人攞獎嘅一屆。利嘉閣同香港置業各有四人得獎，中原就有三個，世紀21有一個。
其次係鬥得獎率，美聯、中原、利嘉閣同香港置業都係百分百得獎，平分春色。世紀21有兩間行分別派人出戰，但只有新域地產勝出。
講番啲得獎者，值得一提有利嘉閣嘉湖銀座高級客戶經理虞立燊，佢喺二十五歲年青推銷員組別（OYSA）中得獎，蘭西記得虞立燊○四年加入利嘉閣，八個月內，連底薪包佣有四十萬落袋，平均搵五萬銀一個月，舊年七月至升為高級客戶顧問，咁快就做埋高級客戶經理。
另外，世紀21新域地產高級物業顧問呂廣蘭，首度參戰就獲獎，梗係開心啦，佢教咗十幾年幼稚園，十五年前搬入愉景灣，加上要照顧仔女，所以轉行做代理，估唔到一參加「傑出推銷員獎」選舉就贏出，佢覺得係自己事業上一個突破。睇嚟呢批攞獎前線嘅成功心得，肯定係公司嘅最佳教材。