大陸地產股續喪炒，小初用到咁激嘅形容詞，唔係想趕潮流，只係真係覺得升到好過份。
上海置業（1207）業績的確正斗，股價升得有理，但上海復地（2337）業績一般，昨日竟然亦升10.56％至3.925元，創下上市以來新高，就認真係令小初百思不得其解。
上星期公布配售可換股債券畀南豐資源嘅沿海家園（1124），上周復牌回一回氣，昨日又再發威，大升37.68％，收0.95元，成交股數高達1.35億股，金額1.16億元。估唔到沿海家園三扒兩撥就升至分析員品題的目標價。
經紀黃上周末講到嘅天安中國（028），亦係大陸地產股，而且股價較資產淨值仍有折讓，所以昨日繼續炒上一啲唔出奇，天安昨日再升6.82％，收4.70元。
經紀黃又話，有傳聞話芬佬發現中國網絡（383）原來揸住唔少天安股份，於是問中國網絡肯唔肯將批貨割愛。假如傳聞屬實，由此可以反映芬佬求貨心切。
慕容小初