港交所董事會下月遴選,睇怕又會有一番龍爭虎鬥,因為身兼香港上市公司商會主席嘅小賭王何猷龍講到明,正考慮參選,佢話希望為香港市場嘅發展服務,亦好開心有唔少人支持佢。由於股壇長毛DavidWebb今年亦會競逐連任,外界當正呢個董事會係佢兩個嘅戰場。
小賭王噚日喺商會午餐會後,主動先發炮,指日前DavidWebb批評港交所喺未經公眾諮詢下,修訂上市規則中有關上市公司對外貸款嘅披露規定,容許上市證券行向單一客戶借貸逾市值8%亦不用披露。小賭王話,Webb講啲唔講啲,實情係港交所事先向業內投資銀行界接觸,佢認為港交所做法十分公平。
同一場合,港交所上市委員會主席鄭慕智都認為,唔係吓吓要公開諮詢幾個月先算係諮詢,特別係市場急速發展,必須反應夠快。
鄭慕智喺午餐會上以公司管治為題目,佢話九鐵近排兵變事件,簡直可以講係本港有史以來,最值得研究嘅公司管治課題,值得港人學習。佢個人認為,上市公司主席與行政總裁嘅權責,應否清晰分開,要視乎每間公司情況而定。