名模李嘉慧（Sofie）本月初誕下逾七磅女嬰，初為人母的她對童年生活自有另一番感受。Sofie自小已經很愛美，才四五歲已偷偷塗母親的唇膏和指甲油上學。不過最鬼馬是Sofie經常趁母親不在家，與哥哥和弟弟喪灑爽身粉在地上，自製超爽「溜冰場」！
九五年港姐亞軍兼最上鏡小姐李嘉慧，父親是馬來西亞人，Sofie盡得雙親的精華，她說：「我好好彩，遺傳咗爹哋嘅高鼻同大眼睛，亦遺傳咗媽咪嘅瓜子面，所以自細就擁有cameraface！」
偕父tea一tea
除了上鏡面孔外，Sofie亦遺傳了雙親的高度，她笑說：「由升上小一到中學畢業，我年年都係成班女同學裏面最高嗰個，所以成日坐最尾。嗰陣見自己不斷長高，都有啲驚㗎。」
Sofie在家中是獨女，排行第二，所以父親對她特別寵愛，Sofie說：「爹哋最錫我，嗰陣佢成日湊我放學，之後仲會去tea一tea，帶我去茶餐廳歎我最鍾意嘅西多士，之後先返屋企。」
俾媽咪鬧餐飽
Sofie自小已十分愛美，她說：「大約四五歲嗰陣，我已經偷偷搽咗媽咪嘅唇膏同指甲油返學，點知俾老師發現，所以成日檢查我啲手指。媽咪知道我咁貪靚，出街都會幫我扮靚搽指甲油。」
小時候的Sofie表面文靜乖巧，原來亦有頑皮的時候。她笑言童年時最愛跟哥哥和弟弟在家中自製「溜冰場」玩溜冰，她笑說：「嗰陣趁媽咪出街，就將啲爽身粉倒到一地都係扮玩溜冰，點知有次媽咪早咗返屋企，結果咪俾佢鬧咗一餐囉！」
採訪：顏英儀
部份圖片提供：李嘉慧
