有時候利世民會諗,究竟金手指孫兄咁落力谷白銀為乜?如果佢篤嘅係股票,你都會講佢有啲私心,不過白銀既唔可能做市,佢亦唔可能因此有乜得着。所以唯一解釋,就係佢一心想出位,想多啲人記得佢個大名囉!
當然,如果孫兄嘅投資建議能夠為廣大讀者增值,咁就皆大歡喜。到現時為止,我哋都唔知孫兄係龍係鳳,畢竟佢嘅投資建議目標年期係十年,大家惟有放長雙眼等啦!不過如果講我個人對白銀嘅睇法,就同孫兄一樣︰StrongBuy。話說白銀每年都係供不應求,淨係呢點都已經夠晒實際。
不過利世民就覺得姿勢上孫兄就笨拙少少。十年投資目標?香港又有幾多人同你等得咁耐?孫兄如果想嚟個難度九點五分嘅動作,就不如同各位讀者分析吓三個月白銀價格,又或者話畀大家知今年底白銀見幾多都好。
跟實成功人士冇走寶
話說原來畢菲特同蓋茨都係白銀大好友,佢哋兩個都已經響呢轉賺咗唔少。利世民一向都話,跟成功人士點都唔錯得去邊。畢菲特出名長線投資,所以相信佢都應該會繼續持有,而阿蓋茨同畢菲特老友,所以佢照跟都係好自然嘅事,雖然蓋茨嗰的多已經係我哋好多世人嘅財富。點解利世民要提呢兩位巨富?因為原來世界每年白銀產量都只不過係六億盎斯,如果呢的巨富都紛紛入市,唔使好多錢都可以一次過挾上。
不過如果各位覺得白銀呢啲長線投資太長線,利世民建議各位可以學吓小弟,買啲白銀首飾送畀家人,咁咪又可以幫家人長線投資,又可以維繫家庭關係,一舉兩得。
利世民