今期豐田F1專刊，不斷介紹新車TF105有幾威，鬼叫佢部F1經常入三甲咩。自從F1更改賽例後（要求每台引擎必須連續使用兩個分站賽），出名引擎耐用嘅豐田F1就常常取得三甲排名。法拉利車隊，你唔抵得咁多，不如攞本睇睇豐田RVX引擎有乜特色仲好喇。
今期主打係Passioneight，講出佢哋引擎點解咁耐用，仲有RVX-06嘅改良之處，總工程師Hiroshi話呢台V8比V10更好用，耐用度有所提升，其中最快方法係降低引擎的轉速來控制動力輸出，不讓引擎操勞過度。
跟住就介紹車隊內幾個重要人物，例如：機械工作室主管、空氣動力學阿頭、引擎部主管嘅心得，嘩，睇豐田F1專刊咁耐，都未見過好似開Party咁介紹車隊人物。
記者：伍旋卓
賽車鞋的秘密
我最有興趣係另一篇講F1賽車鞋嘅文章，原來豐田賽車手係用Alpinestars出品嘅賽車鞋，呢對鞋主要係防火同防滑，袋鼠皮製造，每對只重400g（輕過比賽用跑鞋30%），有FIA認證，售價約為港幣$1,500。
雪地王Tacoma
香港唔落雪，但我睇見呢部雪地王Tacoma，都寫個服字。大相係部雪地王Tacoma響半米厚積雪山坡上行駛，已經好夠賣點，內文仲講加拿大SkiPatrolSystem雪地巡邏隊都係用佢，證明套四驅系統真係好掂。靜靜哋話你知，其實豐田Prado都有類似嘅4WD㗎，香港啲路咁靚，用唔着。