李克勤在年初的頒獎禮上，宣布今年會與女友盧淑儀拉埋天窗，但一直都未有宣布婚期。克勤昨日在拍廣告時說：「今年一定結，都要等世界盃完咗先。」原來在克勤心中，世界盃竟比結婚更重要。
四年一度世界盃是全球盛事，原來對於李克勤來說，六月至七月舉行的世界盃竟然比結婚重要。昨日李克勤在跑馬地馬場為嘉士伯啤酒拍攝電視廣告，經常被追問婚期的李克勤說：「點會係五月呀，就快世界盃，係都等世界盃完咗先，咁多嘢要搞。今年我一定會結，大家放心，我結婚一定會公布，點可以唔公布。」
怕被日夜跟蹤
克勤表示會公開婚期，是不想日日夜夜被狗仔隊跟蹤，他說：「請大家唔好再跟我，我乜都未搞，唔想再累咗啲朋友。好似前幾日食完飯返屋企，有人衝過嚟，我以為拍緊杜琪峯套戲，三個字嗰套，我都唔落車，唔畀佢影好似我唔啱咁，我做呢個圈二十年，都未試過搞到咁。」
四人飲七十罐
而克勤成為嘉士伯香港2006足球大使，耗資七位數字拍攝電視廣告。首次拍啤酒廣告的克勤，除了對酬勞感到滿意，還特別為廣告作了一首主題曲《我着10號球衣》，他說：「今次開心，呢隻啤酒贊助英格蘭，我又係支持英格蘭，可能係咁就搵我做大使，首歌入面講到好多叻嘅球員都係10號。」
講到飲啤酒，克勤表示試過四個人飲七十罐啤酒，他說：「都係幾年前，我拍《浪族闊少爺》（編按：《浪》劇為1991年播出）嗰陣，一收工就去卡拉OK，都幾鍾意飲啤酒。」
採訪：楊潔雯
攝影：陳慧安
