人工基本上係每個打工仔嘅秘密，但多得港交所早幾年修改上市規則，要求上市公司具名披露每位董事嘅薪酬，小股東先可以知道公司董事，每年袋咗幾多錢落袋。其實，保障私隱同公眾利益好難兩全其美，華華覺得後者更重要；況且君子坦蕩蕩，有乜嘢怕人知呢。
新鮮出爐嘅係前特首董建華家族旗下嘅東方海外。東方海外剛公布05年年報，首次披露每位董事嘅人工。董建華個細仔董立新喺東方海外做咗13年，舊年5月正式加入董事局，佢去年人工有137.3萬元，唔知係咪東方海外舊年冇乜樓盤賣，阿少爺負責嘅地產部冇乜表現，所以冇花紅分，只係收薪金。
至於董建華細佬兼主席董建成，全年人工有1400萬元，其中776萬元係花紅，比前年多1.3倍。但呢兩位姓董嘅，都唔係攞最多人工嘅董事。證明東方海外嘅薪酬制度係論功行賞，唔算明益自己人。
最高人工嘅董事係鄒燿華，佢係航運部阿頭，管理東方海外嘅命脈，舊年收入2447萬元，較04年多67%，淨係花紅都收多一倍，有成1900萬元。不過咁，東方海外舊年其實賺少咗3%，點解航運部個阿頭可以收多咁多人工呢？真係諗唔明。
李華華
讀者如有任何意見或報料，歡迎發送電郵至[email protected]。