「喂！得閒出嚟飲茶吖！」雖然呢句說話會成日掛在口邊，但通常都係用來Hea吓啲朋友嘅說話，好少真係會約出嚟。不過今次我哋就專登約咗Viann出嚟，帶我哋去歎番一盅兩件，除咗為新戲《得閒飲茶》宣傳之外，仲睇吓𠵱家巿面有咩新點心推出，等大家唔再用得閒飲茶做藉口，真真正正約出嚟歎吓至潮嘅點心。
記者：曾靜茵
攝影：陳智良、陳盛臣、何家亮
Hairby：BearWong@Salonide
番茄荷包粿$22（e）
白裏透紅又點止用來形容粉面！這個番茄荷包粿，薄薄的水晶皮內除了有豬肉、蝦同帶子做餡外，還加入番茄粒，除了賣相吸引外，味道仲好清甜，擺脫傳統中式點心那種味濃油重的感覺！
果仁金瓜餅$18（e）
賣相精緻的金瓜餅，以鹹水角皮加入南瓜茸製成外皮，一咬之下感到皮脆鬆化，而內裏的奶黃亦見香滑，再加上崧子、欖仁及西杏片，有極豐富的口感。
May：「就咁睇個賣相經已好吸引，細細個南瓜餅好得意，咬落好香脆，啲奶黃好香滑。」
細細個經已好鍾意去茶樓飲茶嘅Viann，以往每星期總會有Familyday同屋企人坐低歎番一盅兩件，而佢最鍾意就係食甜的包點，每次都總要食個麻茸包先至滿足，「除咗叉燒包、燒賣之外，我最鍾意就係食麻茸包，試過最多嗰次連續食咗6個，不過𠵱家唔係度度有得食！」
最愛食包皮
另外炸饅頭亦係Viann嘅至愛之一，不過正因愛食面層的脆皮而鬧出不少笑話。「細細個去茶樓飲茶都好鍾意食炸饅頭，因為可以撕開面層的皮點煉奶食，試過同一大班親戚飲茶，我一邊食炸饅頭，一邊大嗌：『我要食包皮呀！』而引來全場大笑，當時我都唔知佢哋笑乜，大個咗諗番先知佢哋笑乜！」
內餡矜貴
細個一盅兩件，最貴都係糯米雞或者大包，不過今時今日，歎茶都可以好矜貴，連點心都加入鮑魚同魚翅，點止魚翅撈飯咁簡單！
讌滙包中鮑$38/個（a）
唔好睇呢個包外表平平無奇以為係普通雞包仔，打開後發現內藏鮑魚仔，果然係包中有鮑，食落有種煙韌的口感。
威尼斯鵝肝卷$22（c）
新鮮的鵝肝暫時無得食，不妨試吓用罐頭鵝肝製成的鵝肝卷，味道同樣香濃，以紫菜包裹着鵝肝，再加上韭菜、魚肉及麵包絲來炸，夠晒鬆脆。
魚翅鳳眼餃$48（d）
魚翅撈飯就聽得多，用魚翅做點心就好少見，以墨魚膠、蝦膠及馬蹄製成的鳳眼餃，面層還加有約5錢的魚翅，用料十足。
用料創新
近年流行fusion菜，連點心都要玩fusion玩創新，除咗加入日式風味之外，連腸粉同春卷都可以來個crossover，實行改頭換面，換來一個耳目一新的感覺。
百花壽司卷$22（c）
壽司一向都係東瀛的特色美食，師傅改以用蝦膠代替米飯，再用紫菜包來炸，面層的麵包糠非常香口，加上青瓜、蟹柳等材料，亦保留日式的風味。
北園的點心師傅方哥不斷創出新穎的點心，讓客人每次來到都有新鮮感，今次推出的百花壽司卷仲玩埋中日fusion，夠晒創新。
金箔腿茸蘭花餃$38（b）
以半透明的薄皮包着鮮蝦肉及火腿茸，再加入西蘭花及金箔，頓時令餃子的形象變得清新脫俗，口感爽脆之餘，亦能嚐到火腿的甘香。
鳳凰海鮮卷$42（d）
平日食開的雞紮又肥又多油，所以師傅改用蛋皮代替油膩的腐竹，並加入魚肚、石斑肉、蘿蔔及冬菇，味道清清哋，咬落口非常爽，加上色澤豐富，充滿新鮮感。
采蝶軒點心師傅錦哥就以雞紮的靈感創出健康的海鮮卷，食落爽口兼啖啖肉，少了一份油膩感。
相貌誘人
點心的賣相層出不窮，一時可以變成兔仔，一時又可跳入水中變成墨魚，每每做出的外形均可以假亂真，好比一件藝術品。
水晶墨魚金瓜盅$22（e）
以墨魚膠、馬蹄做成的墨魚仔，放入以瑤柱、雞肉、南瓜、竹笙熬成的上湯內，栩栩如生，要欣賞好一陣子才將它放入口中慢慢細嚼，當中墨魚膠加入了馬蹄，既爽口又彈牙，再呷一口上湯，充滿鮮味。
店舖地址：
（a）讌滙 28158282 跑馬地毓秀街11號地下
（b）桃李中菜廳 23134225 尖沙嘴麼地道72號香港日航酒店2樓
（c）北園 27392338 上環德輔道中249號東寧大廈一至二樓
（d）采蝶軒 27186883 山頂廣場地下1號舖
（e）美心皇宮 26289668 旺角新世紀商場8樓