周一港股又掂，恒指升99點，即月期指更叻，升175點，後日結算，高水35點。4月期指收15888，更加高水73點，有二萬三千幾張成交，係3月期指成交1半以上，有參考價值。千祈咪高水太多，否則容易反底，個市不升反跌，掉轉來行。
短炒C輪，可先搵出落後大隻股份，然後睇數據做嘢。
中電信C輪9886：國內4隻電訊股，通通都已派成績表，普遍都獲得市場收貨，是日惟獨中電信（728）冇升，收2.70元，跌1格。中電信本月第2個禮拜，低見2.70元即守得住，𠵱家再見此價，支持力喺度，喺呢個位買C輪，應有收穫。
中電信C輪正路之選係9886，7月中到期，輪價18.1仙，溢價4%，槓桿率14.9倍（有效8.3倍），引伸波幅29.3%。
領匯C輪4509：領匯（823）最高17元，最低16.80元，收中間價16.90元，有0.10元進賬。領匯近期喺16.50至18元之間波動，走唔出呢個框框，可以喺領匯上上落落之間，搵C輪做即市，低買高賣。
領匯C輪正路之選係4509，7月下旬夠鐘，輪價24.3仙，溢價3.1%，槓桿率7倍（有效5.5倍），引伸波幅30.7%。做嘢策略，係喺24仙左右上車，28仙以上離場。領匯C輪有12隻，4509以外嘅，冇乜成交，難做嘢。
章盛