華華噚日介紹過來自美國嘅ErinCrowe（圖一）畫格老肖像出晒名，不過佢以前未畫過亞洲人。今次喺花旗銀行廣場開小型畫展，展出佢幫煲呔曾、唐司長、馬局長及任總畫嘅人像，大家可以睇吓似唔似。
咁究竟畫自己人（美國人）同畫老外（亞洲人），對Erin嚟講有乜唔同呢？佢話：「我遇到嘅一個大問題，係佢哋啲皺紋冇格老咁多！」
佢之前唔認識呢個香港金融四人幫（煲呔亦做過財司），但睇咗佢哋好多相，最難畫就係任總，因為佢頭髮太多，層次又唔分明；而馬局長就膚色最白滑，唐司長臉形最突出，而佢亦好鍾意畫煲呔。
呢批畫大幅賣約5萬蚊港元，另有細幅賣約5千港元，噚日畫展一開，其中一張煲呔曾嘅畫像話咁快就畀美林嘅高層黃桂林（圖二右，左為Erin媽咪）口頭訂咗。
