港股噚日又升，過去6日走勢，係「升跌跌升跌升」，持續係橫行之局，但炒股當道，上升股（唔計認股證）有450多隻，比下跌嘅超出200隻，中資股就以保險同內地地產股表現較突出，金屬同金融股亦有追捧。
華潤置地（1109）去年賺大錢，盈利升17倍，午後股價抽上5.4元高收，升逾10%。內地地產股紛紛報喜，升潮未盡，沿海家園（1124）最勁，全日都係買家主動，掃上0.95元高收，大升37%，由0.4元起步，只係8日時間，升幅已137%。早日推介的中新集團（563），搶上1.0元後回收0.98元，升2仙，成交大增，動力轉強，大圓底收集已接近尾聲，升破1元後，短期可見1.2元，可繼續持有，中線仍以1.5元為目標。
夥拍通用惹憧憬
中國稀土（769）傳下月宣布年度業績時會有好消息，噚日股價有反應，收1.51元，升6仙。稀土嘅好消息，相信同05年度（12月結算）嘅業績無關，估計係同前景展望樂觀有關。其實，若稀土06年盈利再出現高增長，現水平股價實在好抵買。
集團主要經營稀土上下游業務，去年原材料價格上升及供應緊張，而降低出口退稅又令稅務開支增加，導致業績褪色（去年中期盈利便倒退6.3%），但在中央重組稀土產業，大幅提高深加工門檻，以及集團可大規模進行「綠色開採」，在市場競爭方面，已明顯佔有更大優勢。
集團為確保業務增長，除一直進行收購礦場外，亦對部份生產線作擴能改造，以及致力環保及研發更高附加值的稀土產品，毛利率會由去年的低位回升。
看好中國稀土，主要係通用電氣已訂立策略聯盟協議，訂購多類稀土產品，估計每年定單金額會達8000萬元；同時，有消息指通用計劃入股中國稀土5至10%，成為策略性股東，由於雙方已展開全面性合作，相信入股會好快成事。
上個禮拜，中國稀土裂口急升，衝到1.55元才回落，形成旗形整固，噚日再破位而上，照度上去，上升目標係1.75元。
郭兆誠