唔知大家屋企有冇咁嘅情況，個天花由朝到晚傳嚟砰砰嘭嘭嘅討厭聲響，全因樓上住咗隻小魔怪，日日夜夜紮紮跳，推住張櫈當私家車，又或者著住阿媽對高踭鞋，咯咯咯咁通屋走。佢就玩得開心，有個咁快樂兼冇人鬧嘅童年，難為樓下日日夜夜煩到死，同佢父母投訴，幾日後又嚟過，有時真係激氣到想搬屋。
於是乎，有啲人會特別指定買連天台單位，自己嘈人好過俾人嘈。以下有三單頂層連天台單位成交，等大家作為日後換樓嘅參考。
第一單，中原張珂話，九龍灣得寶花園有個頂層395方呎單位，成交價114.5萬，呎價2899元，比市價高16%。第二單，利嘉閣吳國良報料，鰂魚涌南豐新邨，頂層627呎單位，成交價252萬，呎價4019元，高市價7%。最後一單，利嘉閣黃龍智講嘅，北角丹拿花園頂層594呎單位，除天台外仲多個平台，成交價318萬，呎價5354元，亦高市價5%。