𠵱家人人講社會企業，滙豐同恒生呢兩「母子」就似乎做得好落力，上個周末兩間銀行都有活動。
上個星期六，恒生銀行營運總監薛關燕萍（圖左）出席由佢哋贊助、世界自然基金會搞嘅「元洲仔百載回溯」活動，佢仲同鍾逸傑爵士（圖右）喺元洲仔植樹留念。
華華喺活動上見到做咗世界自然基金會副會長嘅鍾逸傑爵士，話佢當年同太太住喺元洲仔，直至獲委任為布政司後先搬離。佢睇住呢個小墟市蛻變成繁盛新市鎮。1986年，佢仲建議將元洲仔改為環境保護研究中心。
另一邊，滙豐執行董事王冬勝就喺滙豐總行28樓主持佢哋嘅義工晚宴，答謝員工在2005年積極參與社會服務，共付出超過48000小時服務社群。滙豐早在1993年成立義工隊，成員超過1900人，成績唔錯。