周迅同章子怡因合作馮小剛執導嘅電影《夜宴》而做咗好朋友，雖然套戲已經拍完，但佢哋間唔中都有通吓短訊，仲約好一定要再合作。周迅接受內地記者訪問時話：「我倆約定了，一定要演姊妹或同性戀。」
暱稱小女孩
唔少人話章子怡好似好有機心咁，不過喺周迅嘅眼中，就覺得章子怡好單純，周迅平時以「小女孩」嚟稱呼章子怡，覺得佢講嘢坦白，處處為朋友設想，學英文又勤力。周迅又話嚟緊五月嘅康城電影節，諗住叫章子怡幫佢繙譯，周迅話：「她真的像一個平常的小女孩，有一次我們去（北京）鹿港小鎮吃冰，子怡頂着帽子就去了，還和鄰桌的人開玩笑呢。」
提到周迅個造型師男友李大齊，周迅話自己搵到幸福，亦從戀愛中學識包容，佢覺得自己寬容咗，同識得以多角度去面對問題。