大陸地產股近期當炒，部份股份更屢創新高，而其他大陸內需股例如國美電器（493）或百盛集團（3368），股價亦企得好硬，反映大陸消費概念仍然受落。
不過，在大陸做送餐業務，亦係內需股的福記食品（1175），股價近排就弱到不得了。
福記喺2月份時，最高見過20元，之後股價掉頭下跌，就算期間曾公布靚靚業績亦冇用，福記上周五收報14.75元，比起20元高位回落26％。
沽壓快告一段落
經紀黃話，福記股價咁弱，玄機在於公司喺去年10月發行的6億元可換股債券，債券換股價只係10.253元，福記股價早排升到咁高，債券持有人唔換股沽貨獲利先至出奇，由於有大沽盤出現，所以福記股價先至咁弱。
最近有分析員見過福記管理層，得悉呢批債券已經換得七七八八，加上公司業績增長仍然強勁，現時可能係趁低吸納的良機。
慕容小初