當年曾經喺香港開過專門店嘅華納兄弟，做咗幾年最後都係捱唔住，要關門大吉。其後由做忍者龜發達嘅港陸攞咗華納兄弟喺國內、香港同澳門地區嘅獨家專門店經營者。佢哋喺04年公布合作，到咗今時今日終於有結晶品出世。
佢哋嘅專門店噚日正式登陸上海，新店揀喺上海市靜安區南京西路，係一條貴氣大街，滙豐保險同埋唔少大飯店都喺呢條街度。而港陸一嚟就開旗艦店，佔地成900平方米。
呢間上海旗艦店，除咗賣佢哋嘅招牌卡通人物產品外，店裏面更設有互動特效嘅照相區，仲有一個為小朋友設計嘅娛樂區。至於二樓嘅中心位置，就整咗「中錄華納正版DVD區」。喺新人事新作風下，點都應該有啲新意思嘅，只係唔知佢哋驚唔驚啲DVD畀人翻版？