歷史教訓，以下犯上向來都冇乜好結果，睇吓九鐵單嘢就知道，噚日尾場馬，飲食界立法會議員張宇人隻「再戰群雄」，挾今季兩勝之勢角逐首本路程千四米，入直路見勝利在望之際，殊不知已超過兩年未再贏馬嘅「另具一格」，卻突然神勇好似支箭咁飛撲上嚟，「再戰群雄」拉士即使力挽狂瀾，但最終依然要俯首稱臣。
咁又係喎，「另具一格」馬主你估係邊個？咪係立會主席范徐麗泰囉，佢係立會之首，當然不容張宇人愛駒來犯，賽後立法會常任秘書長馮載祥，陪住范太同范太嘅公子范駿華一齊拉頭馬，其實勝敗乃兵家常事，對張宇人嚟講只係小兒科啫，今次咪當讓吓范主席，下次補中番咪得囉！
講開跑馬，噚日馬場好高興，皆因賭王隻「爆冷」贏咗打吡大賽，梗係牙擦擦啦。
傳真︰2623-9278
電郵︰[email protected]