「喂，TradingDesk，Karenspeaking。」
「謝太？你幾好嗎？個孫乖唔乖啊？你今日打電話畀我，一定手痕哩，想問吓呢期有乜嘢好買？記唔記得，舊年7月我叫你買個隻中海油？股票編號883呢。又係時候炒佢啦，佢上個禮拜五出業績，幾好噃。」
電話中傳來一點不滿之聲，Karen急忙補鑊︰「有、有、有、仲有得升；不過你咁耐冇睇過呢隻股票，等我同你講番佢啲基本資料先。中海油舊年每股賺六毫二仙，股價$6.35。即係話，如果盈利唔變，賺錢十年，每股應佔盈利就等如今日嘅股價。如果佢將舊年嘅盈利都拎出來派息，公司就有成十厘利息。當然，公司冇派到咁盡，中海油今年派息都係兩厘幾三厘啫。」
雖然知道謝太已經都做足功課，不過Karen仍然半帶輕視半帶挑戰咁問︰「咁你覺得點呀？」
謝太其實早已是中海油擁躉，只不過唔明白為何坊間分析員經常批評呢間公司。Karen解釋︰「我明，我明，我都知你會覺得佢好好嘅，而我都估到你唔明點解啲分析員個個都咁悲觀，啲目標價咁保守。嗱，謝太，賭股票不外乎搵到啲大家都唱衰、不過現實冇人哋講得咁差嘅公司。而最好賭嘅股票，就係搵啲OK、唔差嘅公司、不過有分析員唱淡嘅個啲股票。仲有，最好就係連個分析員都睇好，不過因為佢公司內部政策，迫到佢一定要唱淡。咁好啦，班儍仔聽佢哋話唔買，不過你聽我話走去買。到時，班儍仔覺悟嘅時候，追貨托高股價，你咪有得執囉。分析員唔鍾意中海油，來來去去都係嗰幾樣嘢。」
「第一，佢哋估中海油未來條數唔好，都係因為年年都假設未來油價會跌。02年話03、04年油價會跌；03年話04、05會跌，到04年嗰陣就話05、06油價會跌，次次錯晒，信佢就死。不過冇辦法，係出名大行，睇中海油嗰班分析員，只係負責好微觀咁睇實間公司。睇國際石油走勢呢啲宏觀嘢，係總公司班「專家」負責，所以佢哋一睇錯，呵、呵、呵，就害死晒睇中海油個班分析員啦。呢啲咪就係，頭先我講過，害死分析員嘅大行內部政策囉，連全行最睇好嘅滙豐分析員，都只係睇$8做目標價，你話慘唔慘。」
「第二，佢地唔鍾意中海油派息少。我話佢哋都黐線嘅，中海油如果以前喺02、03、04年，唔派息，拎晒啲錢去買油田，𠵱家仲唔發到豬頭咁樣。我話派少啲息仲好，表示中海油管理層卒之似番個石油好友，信油價唔會跌，盡量增產。」
「第三，班分析員成日都擔心中海油做太多投資，會唔夠資金，令到中海油負債纍纍。嗱，謝太，妳最緊要千祈唔好聽呢啲三流分析。舊年7月，中海油想買嗰間美國油公司，都已經證明「亞公」出咗張附屬信用卡畀中海油，任佢碌。所以，我唔怕佢投資，我最怕佢唔投資咋。」
「第四，好多人話大陸政府會放寬電油呀、柴油呀嘅零售價格。所以，吹呢期買857中石油同埋386中石化，會好過買中海油。嗱，講真，幾年前我自己啱啱入行嘅時候，都為咗同一個理由，買過中石化。最後，由Trainee等到做Manager，由冇眼袋等到𠵱家做咗「國寶」有一對熊貓眼，都未等到。所以你要等，我都冇嘢講。」
「謝太，話到尾，呢個世界實在有太多唔好嘅事發生，禽流感呀、華南空氣嚴重污染，影響細路仔呀、香港嘅學校唔得呀。不過謝太，我都知你唔擔心得咁多，搵啲錢傍身，必要時幫下個孫，買隻有得升、而就算跌盡都有個譜嘅股票。今次個個唱淡中海油，就係一個入貨時機，呢個$6.35位係靚價，我睇佢會升上$9.2。咁啦，你仲有錢喺度，不如我幫你用戶口內67%嘅錢買，跟住每三個交易日到臨收市十二分鐘，你等我電話，等我可以update你。好，好，OK，我落盤囉，多謝喎謝太。你等我電話啦。」
Karen放下電話，對住比佢年長三年嘅同事︰「嗱，咁樣先至叫做sales。知唔知啊，肥仔？」