未來兩星期，有好多滙控（005）窩輪到期；粗略一計，本周涉及的滙控有5億多股，下周有3億多股。上周五大戶已開始做工夫，滙控應聲下跌1.10元，滙控有壓力，港股唔會叻得去邊，極其量打橫行，甚至有機會回落三四百點。
不過，兩個禮拜後再冇大藍籌兼大Lot嘅輪到期計價，唔排除港股會趁呢個「空檔」挾上去，呢一次，有機會3次到頂而破，成功克服16000大關阻力，升番一轉。發行商挾高發新輪，順理成章。
雖然內地地產股有個別消化緊，但大圍個勢仍係向上，而呢輪宣布嘅公司，業績都唔錯。上海復地（2337）05年（12月年結）營業額20.2億元，升10.9%，盈利5.6億元，升24.6%；上海置業（1207）05年（12月年結）營業額13.8億元，升129.37%，盈利3.1億元，升233.7%；雅居樂（3382）05年（12月年結）營業額53.7億元，升111%，盈利9.7億元，升329.9%。
業績公布前可炒一轉
除上海樓價仍受宏調影響外，其他大城市和二線城市嘅樓價，整體而言仍有上升，其中以廣州樓市表現較佳。房產交投增加，地產代理率先受惠，以廣州為主力地區的合富輝煌（733），佣金收入勢急升，4月中宣布05年（12月年結）業績（去年係4月20日）前，可以炒番轉。
合富係廣州3大代理之一，但做一手物業代理業務，就係龍頭大哥，亦係集團的主要收入來源；以今年上半年為例，集團獨家代理嘅樓盤就超過68個，總銷售樓面面積逾1000萬平方呎。合富積極拓展業務，已分別在北京、山東、河南及南京等地設立分公司，現時在14個城市已設有據點，佣金收入持續上升。
二手物業代理業務亦迅速擴展，過去1年分行數目增加70%至逾100間，單在廣州就有93間，年處理交易逾1萬宗。
估計合富05年每股盈利0.27元，06年可上升至0.31元，以06年PE10倍計，6個月目標價3.10元。由去年10月開始，合富股價走勢形成一個大圓底，近日成交增加，有衝破2.40元阻力之勢，照度上去，上升目標指向3.20元。
郭兆誠