鄭嘉穎在娛樂圈浮沉多年，近年始備受無綫力捧，事業漸見起色之際，沒想到其前音樂老師戴思聰，竟要求他履行十三年前簽下的終身抽佣合約。鄭嘉穎的遭遇得到不少演藝界中人同情，中國星老闆向華強太太陳嵐及其緋聞女友周麗淇均公開力撐他。
據知鄭嘉穎跟隨戴思聰學唱歌時，於九二年及九三年分別簽了兩份合約給戴思聰，九二年所簽乃為期五年抽佣百分之二十的經理人合約，九三年在戴思聰哀求下，鄭嘉穎再簽了一份形同賣身契的終身合約，一生的收入均要讓戴思聰抽百分之十佣金。
偷錄電話
戴家姊妹合裝彈弓
但合約簽署後，戴思聰卻從未扶助鄭嘉穎發展事業，而鄭嘉穎的星運亦一直欠佳，直至近年成為無綫旗下合約藝員，才日見起色，但收成還未見之際，戴思聰卻見獵心喜，向鄭嘉穎發出律師信，通知他要履行賣身合約。
後來戴思聰的女兒戴辛蔚主動致電鄭嘉穎，聲稱會協助他解決合約問題，結果電話內容原來被戴家錄音，戴思聰更將錄音內容公開讓傳媒報道，而他的另一女兒戴蘊慧更指控鄭嘉穎教唆其妹撕毀合約，聲稱會保留法律追究權力云云。
中國星老闆娘向太陳嵐了解事件後，她昨日在電話中說：「我都幾同情鄭嘉穎，呢個後生仔潛質唔錯，前途唔應該俾人扼殺，我喺娛樂圈咁耐都冇聽過有啲咁嘅合約，據我所知，呢張合約未必有法律效力，無綫最好搵律師同佢睇吓張合約。」
向太不齒
「放條生路畀後生仔」
向太又說：「當年陳曉東亦係為合約俾戴思聰搞到好麻煩，𠵱家又輪到鄭嘉穎，我覺得佢又唔係等呢啲錢開飯，做乜嘢要趕人哋去絕路？佢咁做只會令自己形象受損，咁又邊會有學生敢跟佢學唱歌，個後生仔喺無綫又唔係搵得好多，已經要俾無綫抽一份佣，重要俾第二個再抽一世佣，真係想迫死人咩？我好希望佢可以放條生路畀個後生仔。」
而周麗淇前晚出席一公開活動時，談到緋聞男友鄭嘉穎的合約糾紛，她說：「合約問題應該交畀律師去搞，要小心處理，千祈唔好亂簽，希望佢冇事啦。」問到她有否致電問候鄭嘉穎？周麗淇說：「冇打，佢打嚟先算啦，適當時候我會打去問候嘅，佢𠵱家要清靜嘛。」
另一方面，吳國敬當年亦是戴思聰的學生，還與其女兒戴蘊慧拍拖，但不知為何，二人相戀期間吳國敬遭人打傷腳入院。吳國敬昨日接受電話訪問時說：「鄭嘉穎合約呢單嘢，我都聽過好耐，知道佢哋兩方面為解約嘅事，搞到唔係咁開心，希望佢哋雙方可以以和為貴。我所知老師係好重視金錢，所以我一向唔會同佢涉及任何錢銀合作。」
拒賣終身
東東350萬贖回自由
此外，無綫製作資源部副總監樂易玲表示，無綫對鄭嘉穎合約風波極為關注，但礙於鄭嘉穎已交由律師處理，故無綫方面不便發表意見，只能給予精神上的支持。樂易玲說：「我初初話簽鄭嘉穎嘅時候，以前嘅事畀到佢好大陰影，我話TVB係個大家庭，我唔敢保證佢一定大紅大紫，但保證佢一定開心。一個人最緊要生活得快樂，今次係一個小風波，遲早都會發生，咪等律師了結咗佢囉。」
其實鄭嘉穎並非首個與戴思聰發生合約糾紛的藝人，據悉戴思聰教陳曉東唱歌時，曾與他簽了一份經理人合約，但後來雙方意見分歧，東東要求解約，戴思聰卻要求東東改簽一份終身可抽佣的合約，但遭東東反對，雙方鬧翻後，戴思聰要求七百萬元賠償，東東最終以三百五十萬元解決糾紛。想不到幾年後，類似情況又發生在鄭嘉穎身上。曾與戴思聰發生合約糾紛的陳曉東，昨日在電話中說：「過咗咁耐，我唔想提呀。」
採訪：陳月媚、比華利 部份圖片：《壹週刊》
