睇《春田花花同學會》，就好比一隻Kinder出奇蛋，一次過滿足晒三個願望；有卡士、有笑料、有訊息。麥嘜麥兜跟明星Crossover、土產漫畫拼真人演出，沒有預期的格格不入，一幕幕卡通動畫與一場場明星演技Show的互相交接，令故事更有人情味，並非單單睇一套卡通片過於離身，以搞笑帶點誇張的演繹反映社會唔同工作崗位，話唔定戲中的其一角色就是現實的你同我。
記者：招佩珊
同前作《麥兜故事》及《麥兜菠蘿油王子》的最大分別，今次動畫只佔小部份，以真人拍攝為主。故事由一宗挾持人質案件開始，接着由賊人提出叫外賣要求，再扯到去「春田花花幼稚園50週年」慶典，勁無厘頭！
現實寫照
原來，陳慧琳、鄭中基、黃秋生等人都是春田花花幼稚園校友；小時候「我的志願」憧憬成為社會棟樑，今日在社會每個角落從事唔同工作，無論是雞腳Lun骨工人、上班族、鹵味師傅還是劫匪，營役奔波最終都係為兩餐，以笑中帶諷手法反映小市民百態。正如陳可辛講，春田花花幼稚園即是代表香港，戲中各人代表以前、今日同未來的精英，或者呢樣就係編劇要講的訊息。也許要領略電影訊息太過複雜，簡單點當佢笑片睇大可輕鬆笑番個半鐘；而本是麥嘜Fans的筆者，唔會好似上次睇《麥兜菠蘿油王子》咁瞌眼瞓，今次飛走上集的立體動畫，返回漫畫基本，睇得好舒服。
自選戲中之最
大堆頭卡士，似是港產賀歲片一貫作風，不過今回用到四十幾位明星，有歌星演員、有導演韓星、有影帝影后，在片長只有90分鐘下，平均只不過是幾分鐘戲份，有的出咗場就唔知佢做過乜，有的就令人留下深刻印象，好戲唔好戲，全靠明星個人演技。講到最好戲，筆者一定揀詹瑞文，佢嗰段做導師教同事做人要有Point的戲，失驚無神「噼啪」一吓暈低，示範何謂做人「虛」同「浮」，個人覺得是全戲最精采；不過人太多時間太少，個半鐘塞四十幾個人，確實跟得有少少吃力。
《齋鹵味》MV睇志偉扮師奶
稱為「課外活動」的Bonus分5個部份，包括分幾鐘唔算好笑的NG片，有陳可辛、趙良駿、曾志偉加演員講述的製作特輯，另加Show陣容的台前幕後人員名單；而之前聽過黃秋生同吳君如聲音演繹的「常餐、特餐、快餐」，今回於Trailer一欄內，就有一段真人表演，但內容換上墨魚丸、水餃、米粉等，雖然玩番同一樣嘢，新意欠奉，但黃秋生儍更更個樣，連聲連畫，相當爆笑！再加多3首於電影中出現過歌仔，Cap番戲中片段加埋番啲字幕變成MV，當唱卡拉OK夠晒過癮，「齋鹵味，至正係拜山食」，正！
《春田花花同學會》
價錢：$74
區碼：3區
發行：鉅星（香港）
聲效：DD5.1、dts5.1
字幕：繁簡體中文、英文
售賣點：DVDPro（23326326）
地址：旺角奶路臣街6E德發商場地庫B4舖
