杜指上周五升9點，收11279。全周微升0.32點，周線圖上高位出現1粒十字星。參考過往杜指周線圖走勢，在高位出現十字星後，下周多數報跌，但這次上升動力相對較強，現時杜指企在保歷加通道頂之外，技術保持強勢，且看今次會否例外。
美股走勢未有太大啓示，但上周五在美國預託證券上市的港股大藍籌則普遍造好，滙控（005）較香港收市升0.41元，收130.51元，中移動（941）升0.45元，收38.90元，長實（001）升0.16元，收80.61元，但和黃（013）就跌0.28元，收71.92元。如果日股今日亦造好，港股有望反彈。
大行近日的報告，對長實及和黃的前景看法相當參差，而公布業績後，和黃走勢向下，上周五收72.20元，跌0.65元或0.89%。技術上，和黃已跌近05年3月至今的支持軌，假如71.60元確認失守，新一輪跌浪將會展開，真跌至花旗目標價63元亦唔出奇。
長實相對走勢較佳，但上周五先高後低的走勢亦頗為肉酸，低見80.05元，一度跌穿10及20日線，幸而最後抽回兩線之上收市，才不致太難睇。長實現時企在20日線（80.25元）之上，短期上落區在80.25-82.65元。假如失守20日線，則波動區會下移至80.25-78元區域。
港股短期走勢主要繫於利率的趨向，美聯儲局明日議息後，一切將較明朗。讀者要買貨，不妨睇定啲才郁手。
上石化消息勁
上周提過市場吹風，就快有石化股落實私有化，昨日同大行老友入場睇打吡時順便索吓料，佢話唔係太清楚，但上周五升得最勁嗰隻上海石化（338）就傳係呼聲最高，但隻股已經升咗咁多，高追亦有一定風險。
至於儀征（1033），最好睇埋本周五公布的末期業績，才決定買唔買。
趙飛雲