陳日君獲封為樞機，全球中國人都引以為傲，當然最頭大係北京，因為陳樞機一從教宗接過指環後，第一時間就向中國教友廣播，真係奈佢唔何。
得到梵蒂岡重用，陳樞機睇嚟有排都未退休，而且唔會離開香港，按佢嘅行程安排，一回港之後已經安排得密麻麻，包括會開一個大型嘅慶祝酒會。
香港志奮領留英獎學金學者會就好醒，一早請咗陳樞機喺下個月二十一日出席基金在港十周年嘅紀念晚宴，並發表「當耶穌遇到凱撒」嘅演講。英國駐港總領事柏聖文同英國文化協會總監RuthGee已經話咗會嚟。
陳樞機對政治問題一向唔迴避，大家都估佢獲封，係羅馬教庭準備要陳主教幫手搞搞中梵建交。陳樞機唔知係咪想講，佢同煲呔交手嘅經驗。啲人成日屈主教干政，其實信唔信天主、係唔係教徒都好，都知道民主好過獨裁啦，陳樞機只不過係講呢啲嘢啫，咁又有乜問題？
傳真︰2623-9278
電郵︰[email protected]