孫柏文今日幫大家用隻金手指，篤一場比較有趣嘅官司嚟參考。原訴人係一間Cheap啲都買唔到嘢嘅公司，被告係一間畀你買嘢可以Cheap啲嘅公司。原本河水不犯井水，不過佢哋兩個今日就對簿公堂，原因都只不過係我哋香港人熟悉嘅A貨、老翻所致。早幾年，Tiffany聽到喺eBay有販賣佢哋翻版產品嘅行為，所以喺2004年佢哋做咗一個研究。Tiffany嘅研究員喺eBay上買咗兩百件賣家自稱為Tiffany嘅貨品，結果得大約十件係真貨。Tiffany自然唔高興，張牙舞爪，話要告eBay。
大家一睇，都會暗地裏問：「有冇搞錯呀？用30蚊買一件平時要用幾千蚊買嘅貨，都仲估係真貨？」聰明人都會感受到eBay嘅慘況，eBay平時喺任何一刻，都有四千萬件貨品同時出售，1億3千萬個用戶同時瀏覽，嘅有機制去懲罰唔誠實嘅賣家，又有回水畀嗰啲用30蚊買一件仲估係真貨嘅買家，所以冇話eBay冇得打。還看花旗國法院怎樣判。
靠互聯網發達 請到花旗國
不過好在eBay唔係一間香港公司，如果喺香港，香港政府不單止要封呢隻「虛擬」艇，重要拉主持人PierreOmidyar，因為佢連領帶都唔打、又唔剃鬚會教壞細路。高官局長又會開記者招待會，解釋香港政府會不惜一切打擊翻版，eBay喺其他人賣翻版活動中，賺取利潤，所以係邪惡軸心公司。就算有幾千萬個正貨賣家受到遭殃，都少理。其實，早在1995年的2月23日，香港還是世界數一數二有效地把互聯網商業化嘅地方，香港政府已經不惜一切打擊「非法」上網活動。
當時，政府連email都唔知係乜，淨係知道「政府唔識」，你就唔可以用。當時一日之間，政府關閉香港六間互聯網供應商其中四間。令到香港年輕人覺得互聯網世界，係一個香港政府唔明，不過又唔會畀人搵錢嘅世界，不准突破，不准試驗。如果想用互聯網幫助其他人解決他們的問題，繼而發達，請到花旗國。
法國人話：「PlusCaChange，PlusC'estLaMemeChose。」（時代愈變遷，有啲嘢就愈唔變。）對香港政府最貼切。
孫柏文