張敬軒身形瘦削，自小已是個藥煲，受哮喘困擾致體質孱弱，慘被同學仔改了個花名叫做「貓軒」，某天張敬軒被屈發難，向同學掟石仔，結果弄得對方頭破血流。
環顧樂壇眾男歌手中，張敬軒可算是「輕量級」──按其體形而言。自小在廣州長大的他，體形一直偏於瘦削，還經常出入醫院，令父母擔心之餘，也經常為這個家中香爐躉而疲於奔命。日前張敬軒接受訪問，提起孩提時代病到五顏六色，也語帶無奈地說：「我細個好多病，因為哮喘搞到體質唔好，如果有一排唔使去醫院，阿媽直情上香還神。嗰陣我有個花名，叫做『貓軒』，但我冇話因為人哋改花名唔開心。」
罰洗課室
張敬軒口裏說不介意，可是小學五年級那年，「貓軒」終於發難渣，他說：「嗰次係學校運動會，有幾個同學寃枉我，唔記得乜嘢事喇，我同佢哋鬧交，跟住就搵嚿石頭掟穿咗一個男同學個頭，我幾騰雞呀，喊囉！仲即刻打電話話畀爸爸知。嗰次本應要記小過，但爸爸嚟到學校後同人道歉，賠咗啲湯藥費畀人，我就俾老師罰清潔課室一個學期。」
婆媳互片
張敬軒是獨子，雙親對他管教極嚴，張媽媽更會施體罰，張敬軒笑說：「我細個都係個『口賤』嘅細路，成日激到媽咪跳吓跳吓，輕則兜巴星，佢試過用三角形嘅鐵線衣架咈我，結果衣架打到屈成直線。」
張敬軒又想起有次嫲嫲因做「架樑」，演變成婆媳互片，他笑說：「有次媽咪攞碌竹打我，嫲嫲出手擋住，所以咈到嫲嫲隻手，我記得嫲嫲火都嚟，話『豈有此理！夠膽打我？』，跟住就演變成婆媳衝突，同媽咪嗌交囉，但後尾都冇嘢嘅。」
採訪：朱倬誼
童年相片提供：張敬軒
