民主黨呢期搞反滲透工作，點知搞吓搞吓變咗黨爭，令主流派同少壯派矛盾加深，好彩內部有個調查小組會查明事實，先至令白鴿黨黨員安心番。
咁佢哋嘅對家民建聯又點？會唔會都查吓有冇滲透黨員？副主席譚耀宗對此似乎有百分百信心，絕對相信黨員嘅忠誠度，仲笑笑口同八方話，驚脂肪滲透仲多啦；估唔到男士們都對自己嘅身形咁着緊。
民建聯二十幾個常委，會喺四月一日愚人節，去澳門兩日遊。去到人哋地頭，拜會吓特首鏵哥梗係自必然㗎喇，但除此之外，都會睇吓港珠澳大橋落腳點、睇吓東亞運動會場地設施，以及去邊境加工區視察吓，佢哋仲賣大包請埋記者一齊去，真係照顧傳媒。
譚耀宗去完澳門，復活節又要出門，帶住一班年輕人去惠州考察，順便就梗係要放吓假休息啦。復活節假後，選委會改選一觸即發，到時要瞓身搞，點會有時間休息。
傳真︰2623-9278
電郵︰[email protected]