今個禮拜算係06年第一季嘅最後一周，如無意外亦應該係05年11月開始嘅升浪嘅尾聲嘞。利世民自從聯儲局新官上場第一日就呼籲大家扣好安全帶，享受吓過山車嘅滋味，𠵱家過山車已經升咗成千三點，夠High未？
今個禮拜伯南克第一次主持聯儲局公開市場委員會，市場已經預期加息0.25厘，冇乜理由會唔加。之不過如果伯南克加得多過0.25厘，睇怕個市場都唔識反應；又如果佢直頭唔加息，咁就真係大禍臨頭矣！
𠵱家美國最大嘅經濟炸彈叫做房地產。伯南克最頭痛嘅地方，係唔可以好似隔籬孫兄咁亂篤，一個唔覺意篤爆美國房地產泡沫，美國未來幾年就必然有如山洪暴發。情況可以有幾嚴重？當年香港負資產有幾慘我哋心裏有數，但係都未有銀行要執笠。𠵱家美國只要有5%嘅業主斷供，就已經可以令兩大房產按揭公司破產，到時美國政府只得一招，就係用鈔票氾濫市場。不過今次要用成萬億，真係見到百年一遇嘅資金潮。
建議忍手為上
講番香港，恒指2月同3月夾埋試咗兩次都攻唔破萬六點，照常理都係時候鳴金收兵。加上𠵱家市場炒嘅已經係二三線古靈精怪概念股，呢個市實在唔值得留戀。傳統上，五窮六絕七翻身，加上秋官新戲上，利世民都係建議忍手為上，等下半年前景明朗先再謀動。如果閣下真係一日唔炒會身痕者，又或者可以學吓金手指話齋炒金銀。
有錢，冇機會，可以再等。冇錢，有機會，可以點呢？所以，如果冇必要就唔應該犯大險。買藍籌者都仲可以等收息，等返家鄉，二三線古靈精怪概念輸錢事小，日後令你連機會都輸埋就唔抵！
利世民