近年興講健康飲食，米太都唔執輸買番茄入饌，佢話番茄顏色又靚又有營養價值，好似呢排紅衫魚當造，可以用番茄燜紅衫魚，吊晒紅衫魚啲鮮味出嚟；或者整味番茄菠蘿咕嚕肉，酸酸咪咪小朋友實鍾意啦！不過要記住，唔好太快落番茄，等其他主菜、配料煮好臨上碟前一兩分鐘先好落，如果唔係就會流失營養㗎喇！另外，番茄偏寒，消化不良同埋容易手腳冰冷嘅人就唔好成日生食番茄，如果唔係身體就會更加虛寒㗎！
