恒指1周埋單，唔見85點，差不多啱啱係滙控（005）除息嗰份（86點），即係恒指全周實際冇變化。又有咁啱，美股杜指全周微跌5點，又即係冇變化。
港股本周四期指結算。結算前，估計觀望氣氛濃厚，每日交投唔過280億元，等3月過後，好淡雙方再見真章。
兗煤C輪9855：神華（1088）跌落去升得番，現價12.85元，非常接近新高。神華C輪自然隻隻生猛，輪價高企，高追唔係人人有勇氣。如果真係鍾意賭神華C輪，9573數據則最啱睇。
神華神氣，兗煤（1171）都唔會耷到去邊。兩隻煤股相差太遠嘅話，啲錢好易流向兗煤。見兗煤稍為回軟，趁低揀C輪買，對象係9855。隻輪7月下旬到期，輪價92仙，溢價1.8%，槓桿率7.2倍（有效5.1倍），引伸波幅40%。隻輪交投唔多，但其他兗煤輪更難買賣，而數據則有不如。
東亞C輪9046：大隻銀行股中，東亞（023）近排最醒，2月初派成績表後到𠵱家，升幅達16%，計埋末期息0.93元，升夠20%。有位炒咗35年股票嘅阿伯話，東亞升，唔係完全靠張成績表，最吸引人嘅地方，係大股東持股%唔高。買東亞C輪，幾乎冇得揀。9046最靚，但1日成交得1球，1個人全部買晒都唔會發達。
章盛