電盈前副主席張永霖幫港台做咗百幾個鐘嘅節目，坊間傳咗好耐，話佢會收咪；佢老哥都不時同華華呻，話個節目搞到佢心力交瘁，真係好想唞唞，又話同港台一眾高層講過好多次唔撈，只不過對方次次都唔回應，令佢唔知做好定唔做好。噚日佢終於喺節目度親自解畫，話會繼續做落去。
Linus同華華講，佢真係諗住唔做，事關佢興趣多多，又唔愁生活，為乜要忙成咁喎？咁又因乜要做落去呢？佢話睇到好多有關港台檢討嘅言論，令佢好擔心──擔心言論同新聞自由！
佢話，今次決定繼續做落去，就連每輯一千蚊嘅車馬費都唔收，但就唔會講做到幾時，大家亦都冇簽合同、冇協議，如果日後佢唔做，原因只得兩個，一係港台有人唔鍾意佢把聲，一係佢唔妥上面班管理層，無論係邊個因素，到時大家就後會無期。
咦！唔通有人壓制佢嘅言論？佢一聽到華華咁講，就即刻話，做傳媒嘅應該好清楚發生緊乜事，之但係究竟係乜事，就永遠唔會由佢把口講出嚟。
做過國泰同電盈兩大企業嘅高層，張永霖講嘢一向好鬼謹慎，佢咁講，真係令人覺得有啲嘢。
李華華
讀者如有任何意見或報料，歡迎發送電郵至[email protected]。