中文大學眼科及視覺系主任林順潮噚晚同細佢二十年嘅遼寧女友李肖婷喺會展擺下百圍婚宴，全港高官名人都畀足面嚟飲佢哋呢餐喜酒，前特首董建華六點鐘單拖先到，唔夠十五分鐘就到特首曾蔭權同夫人出現，真係一前一後亮相噃，新舊特首都嚟祝賀，認真唔簡單。
唔知係咪林醫生同好多名人醫過眼，所以賓客都眼仔晶晶，非常醒神，唐唐、阿松、任總、寶哥哥、田二少、飛哥都同老婆一齊嚟，局長亦唔少，李國章同葉澍堃都有到，至於商界，就見到郭炳湘同鄭裕彤。
林順潮同嬌妻結識於○四年李肖婷參選華裔小姐，當時林順潮做評判，之後兩人就開始來往，李肖婷後嚟仲做咗林醫生下屬㖭。
舊年七月佢哋去西藏參加健康快車義工活動，李肖婷適應唔到患咗高山症，林醫生悉心照料佳人，咁就通咗電啦，舊年聖誕節林醫生去到嬌妻老家瀋陽求婚，成功娶得美人歸。
林醫生仲大爆自己誠意求婚其中一條橋係將「小小姑娘」呢首歌仔頭嗰句自填新詞，改為「我與肖婷，天天相見」嚟冧嬌妻，問到幾時造人，林醫生就話：「我阿爸已經有十一個外孫、十一個內孫，佢話差兩個就夠兩打，咁你哋鼓勵吓我老婆啦。」
攝影：仇志德
傳真︰2623-9278
電郵︰[email protected]
