陳欣健寶貝女陳早茵（Joanne）同韓君婷嘅同性密友關係，已係公開秘密，但Joanne日前拖韓君婷喺中環蘭桂坊Volar蒲吧斷背，相隔幾條街嘅陳欣健，同時企街俾女鍊背，兩父女陰陽兩極，都算無奇不有。
被摸手仔
雖然陳欣健已經五十有八，但嗰晚竟然着住件sharp到暈嘅橙色蛤乸衣，同一位冶艷女郎企喺中環擺花街等車，嗰位同行女伴極厚粉，面上脂粉搽到七彩繽紛，滿載春意，唔怪得陳欣健見到佢即刻如沐春風，當時女伴仲主動幫佢鍊背，雖然成街都係人，但陳欣健一於少理，瞇埋雙眼等女服侍，個樣仲鬼咁疏乎㖭。
所謂虎父無犬女，另一邊廂嘅Joanne亦拖韓君婷去蒲吧，雖則佢兩個喺吧內各有各玩，但Joanne一直昅實對方，其間韓君婷被一名女性朋友摸手仔，Joanne一見即刻黑面，跟住就同佢不瞅不睬，到三點零離場時，Joanne撇低韓君婷，自己一支箭標上的士，由得飲到high，但踩住幼跟高踭鞋嘅韓君婷落斜路，死死氣跟佢上車走人。其實佢兩個成日都嗌交，唔知返歸後，又會唔會開片吖喇？
Textby關仁
