楊婉儀和夫婿王瑞勳最近進軍出版界，獲中國旅遊協會獨家認可，出版在內地免費派發的香港旅遊雜誌。夫婦變工作夥伴，每到深夜都會熱烈討論公事，少不免有摩擦和拗撬。 撰文：RitaLeung
著名前練馬師王登平的兒子王瑞勳（Simon）與太太楊婉儀（Winnie）結婚近三年，去年五月誕下囡囡王婷知（Hannah），現正開展另一大計，將共同興趣變作創業大計，投資七位數字，出版在內地免費派發關於香港lifestyle的旅遊月刊《翱遊》（Premiere）。
老爺人面廣
月刊在上海推出的試版反應不俗，發行十二萬本，現正密鑼緊鼓為下月初正式登陸內地作最後倒數。穿情侶裝的王瑞勳與楊婉儀日前在辦公室細說他們的出版大計，王瑞勳說：「之前份工成日去上海公幹，唔少內地朋友都成日問我香港旅遊好去處，想試下捐窿捐罅去搵地道小食，而Winnie嘅外國朋友嚟香港又會問我哋意見，我哋好似travelguide咁。」
《翱遊》的基地定於北京，最特別是與內地官方單位合作，王瑞勳說：「呢本雜誌係中國旅遊協會邀請我哋合作，係佢哋全國獨家認可嘅旅遊刊物，因為我屋企關係，爸爸喺內地人緣好，識得旅遊協會領導，唔止雙贏，係四贏局面，對我哋係好好嘅商機，中國旅遊協會覺得對內地遊客好，我哋幫香港旅遊協會發展，內地旅行社又多咗增值服務。雜誌係一個平台，之後我哋會部署喺內地搞PR活動，推廣香港品牌，實行一條龍服務。」
其實出版在內地免費派發的香港自由行月刊殊不簡單，賭王何鴻燊四姨太梁安琪出版的旅行書籍《自由行》，便結業收場，今次王瑞勳以香港人身份獲官方大力支持，實屬難得，所以他們更加不敢怠慢。
《翱遊》剛於上海的試版，以楊婉儀銀幕上的老公仔阿旺郭晉安做封面人物，她說：「TVB唔少藝員好支持我哋，會義務幫手，好似阿旺套劇啱啱喺內地播，所以本書反應好好。」
嗌完交互𠱁
王瑞勳和楊婉儀由夫妻延伸到工作夥伴，二人分工合作，王瑞勳負責運作，楊婉儀除撰寫專欄，會嘗試有關marketing的工作，她說：「可能我大學讀新聞系，好鍾意寫作，𠵱家仲開始做marketing，感覺好特別，去見客好似喺TVB做liveshow一樣，冇得NG，之前又要做research，雖然未必call到客，但就好有成功感。」
二人合作會否有摩擦？王瑞勳坦言多了拗撬，他說：「因為我天生就鍾意批評人。」楊婉儀則說：「好似深夜囡囡瞓咗覺，我哋嘅話題都好似開緊會，冇得放工，亦試過交proposal，好似交功課畀老師咁改到七彩，都有少少挫敗感。」在旁的王瑞勳即補鑊說：「我不嬲都好想佢幫我手，因為佢做嘢諗法同思想都好全面，加上佢平時出鏡做司儀好淡定，表達能力好好，雖然我喺香港出世，不過佢啲中文仲好過我。」楊婉儀聽罷亦笑着附和說：「其實佢個人好有計劃，心中已經部署咗未來一年嘅發展，擔當leader角色，好似佢之前唔識講普通話，去咗內地一年，已經講得好好。」
少時間陪女
二人為這個結晶品花盡心思的同時，久而久之忽略了十個月大的囡囡，楊婉儀說：「又要同TVB拍嘢，剩低時間又要搞本書，好似變咗Simon咁，一日可能只得兩個鐘陪個女玩，有時做嘢太掛住佢，都要即刻返屋企見囡囡。」王瑞勳更將女兒相片做了辦公室電腦的桌面及滑鼠墊。
王瑞勳又希望籌備一家三口去旅行，他說：「自從囡囡出世，我哋兩個都未去過旅行，希望佢大個少少，我哋可以去夏威夷，因為我好鍾意陽光與海灘，不過佢太細，可能帶佢去坐一個鐘頭飛機嘅台灣熱吓身。」楊婉儀笑說：「佢太細個喇，驚佢坐飛機唔適應，最遠都係去過上水咋。」
攝影：MatthewLam
