有線主持陳貝兒 只捧老外主播
在加拿大受教育的陳貝兒，英文叻過中文，當然對外國主持比較有深刻認識，她說：「OprahWinfrey（奧花雲費），佢係一個非洲裔女主持，但佢冇因族裔問題受影響，反而愈嚟愈受歡迎。LarryKing佢係CNN嘅著名主持，佢最犀利係將時事新聞娛樂化，娛樂新聞政治化。我最難忘就係同李安做訪問，因為我由佢喺康城攞金獅獎，之後有關佢嘅訪問，都係我做，覺得佢好照顧華人傳媒，好似今次奧斯卡佢行紅地氈時，不停俾人趕入會場，但佢認得我喎，同個PR講畀多一分鐘大家。」
有線主持陸浩明 睇曹查理學藝
6號表示最欣賞的主持是曹查理和盧大衞，他罕有地認真回答說：「我十八歲屋企有有線後就睇佢主持成人節目，當中氣氛一流，佢直頭入型入格；至於盧大衞，我好細個睇佢嘅《歡樂今宵》都覺得佢做綜藝節目一流，佢好識搞氣氛，畀人親切感覺。」
講到難忘經歷，筆者在6號未答時已搶先問他是否去年代表有線訪問金像獎主席文雋被窒呢？但口才驚人的6號卻說：「基本上嗰次唔係一個訪問，但引起咁大迴響，我都意外，𠵱家見到都有同佢打招呼，佢又向我單眼。」
無綫主持宋芝齡 以Do姐為目標
宋芝齡被問及最喜愛的主持時爽快地說：「Do姐（鄭裕玲）好淡定同好有氣勢，佢嘅生活習慣好有規律，有做瑜伽，又有睇書，我以前唔睇書，𠵱家就會以Do姐為目標。」
至於難忘經歷，宋芝齡說：「最難忘應該係第一次飛去韓國同池珍熙做無綫獨家訪問，因為係第一次見韓星，當時自己好緊張，把聲直情震晒，問嘅語氣又唔肯定，出嚟效果唔多好。」
無綫主持崔建邦 讚肥姐好記性
問崔建邦最喜愛的男、女主持時，他第一時間表示是志偉，而女的就開玩笑說：「唐詩詠（即其女友，二人曾合作主持《K-100》）。」其後他才改口說肥姐沈殿霞。至於原因，崔建邦說：「佢哋教識我好多嘢，喺佢哋身上我睇到有無限嘅可能。肥姐好專業，我哋做騷前會有司儀開會，佢第二次開會，成份稿都已經背好，我暫時見得佢一個係咁。其實好多訪問經歷都好難忘，其中好似訪問鄭秀文，因為一來佢係我偶像，同佢做訪問真係好驚，佢咁紅，但其實佢個人好真性情。」
攝影：葉君海 髮型提供：Pius、Sam@O4Group（Janis）
化妝提供：CMMMonitaHair@beautyCollege
服裝提供：PatriziaPepe（陳貝兒）、SistyrMoon（崔建邦+宋芝齡）
