十六歲那年，Ella遇上她的初戀，對方是她在英國讀書時監護人的兒子，不過，這段初戀不單止未有留給她美好回憶，反而給她造成莫大的傷害。
撞破男友拖女
Ella說：「拍拖嘅時候，大家成日嗌交，有一次，大家嗌完交之後冇幾耐，我喺街撞見佢車個女仔，於是我打電話畀佢，諗住問佢究竟發生乜嘢事，點知佢聽都唔聽就cut咗我線，由於當時佢只係車個女仔，冇親熱舉動，所以我都不以為意。點知事隔冇幾耐，又俾我撞見佢，當時佢拖住個女仔，我見到之後成個呆咗，嗰一刻個腦一片空白，唔識點反應，佢由始至終都冇同我講過分手，我哋嗌交都未夠一個月，咁快就識咗第二個？就算係識過第二個女仔，係咪點都應該同我交代清楚先！
「我好清楚記得，佢細佬企喺哥哥同個女仔身邊，一味望住我不停偷笑，好似抵我死咁款，我知佢弟弟一向好唔鍾意我，但都唔使當住全世界面前恥笑我！我當時嘅感覺就好似全軍覆沒咁，今時今日我仲記得好清楚。」
遭女藝人出賣
除了感情受騙外，Ella初入行時試過被一位跟她同時期出道的女藝人出賣。「我好容易同人friend，將自己一啲私事話畀朋友聽，點知佢是非當人情咁話畀傳媒知，好彩件事對我唔係造成太大傷害，事後我冇踢爆佢，亦冇去追究，因為我屬於多一事不如少一事嗰種人，同埋我覺得啲人心地唔好，做呢行都會做得唔長，惟有自己日後小心啲，經一事長一智！」