今個星期又到影娛博覽，香港政府其實都算做得唔錯，不過又被杜琪峯導演鬧，我估班搞手都有少少意外，其實大家都預咗被杜導演鬧，所以頒個最受歡迎導演獎畀佢，點知都鬧。波波都有去個博覽會度八卦吓，所以都可以講番句公道說話。
其實整個影娛博覽包括好多活動，有「香港國際電影節」、「香港電影金像獎」、「IFPI唱片銷量大獎」等等。當然最重要就係能夠提供一個機會，一個平台畀外國買家選購香港影音產品，本地製作人亦可以有機會找到合適的投資對象，進行融資。
搞這類型展覽活動其實真係少啲心血都死，要顧及的層面多而廣，影視娛樂行業內的人際脈絡複雜，專業準則不一。政府已經做得唔錯，始終這類型博覽會需要時間建立口碑，亦需要買賣雙方真的能夠找到商機，做成生意才可令口碑擴散，我個人覺得明年應該加入國內的影視公司才可令影娛博覽更加吸引和國際化。
我相信經過一段時間後，以上部份將會愈做愈好，至於引起杜導演怒駡的部份其實是影娛博覽的開幕晚會，當晚人才濟濟，特首，高官齊齊出席，明星當然更加畀面，政府叫到，點會同點敢唔去呀。人就真係好多，但係毫無焦點，大小明星確實係做晒布景板，最後仲要搞個唔知邊度投票出嚟嘅最受歡迎男女演員及導演。我都好贊成杜導演講，你畀多十個獎梁朝偉都冇用，佢都唔拍戲，亦都唔會幫到香港，但係杜導演連自己都鬧埋就真係……勁。