讀小學，隔籬位同學仔是高材生，理由很簡單，因他的娘是小學教師，放學回家同學仔就日日接受特訓。今次見到這幾隻活潑狗仔，站立、跳高、跳舞、跨欄、扮死，甚至大暴走樣樣皆能，原因同一個，因牠們的主人是狗隻訓練導師鄧師傅：「其實乜嘢品種嘅狗都可以接受特訓，隻隻狗仔都有機會喺服從比賽中名列前茅。」
記者：黃藹瑩
攝影：林栢鈞
愛狗應該訓練狗
受過訓練的狗仔認真厲害，隻隻都大膽不怕醜極有表演慾。採訪當日鄧師傅帶4隻愛犬到山頂，我想找隻狗仔示範一下最簡單的入門級Command時，4隻小狗立即狂叫，像向我說：「揀我啦！揀我啦！」場面極搞笑。經磋商後鄧師傅決定派愛將Joyce表演：「Joyce今年5歲，係隻邊界牧羊狗，好聰明，好多新招一個上晝就識，佢9個月大已經喺服從比賽高級組賽事裏面打低唔少警犬，叫佢表演就最適合不過。」好多人，包括我在內，以為特訓狗仔是苦了狗仔，原來這想法是錯的，鄧師傅解釋：「養得佢錫得佢就更加應該訓練好佢，唔係單單為咗表演娛樂，係教曉佢點樣求生，無受過訓練嘅狗仔一遇危險淨係識亂叫亂走，完全唔識點樣遠離危險。」
Joyce強項（邊界牧羊犬）
1.扮死狗
一聲「Bang！」指令，Joyce自自然然扮掙扎，繼而再詐死，鄧師傅：「其實教隻狗詐死一啲都唔容易，如果人家送隻狗嚟訓練，詐死唔係第一樣教嘅嘢。」原來詐死都是高難度的動作，咁真係要欣賞一下了。
2.大狗跳小圈
表演跳圈？個圈呢？鄧師傅：「攞咗出嚟喇。」不是嘛？Size這麼小，怎跳？「無問題喎，個圈再細啲都仲得。」沒騙你，醒目的Joyce略一助跑真的成功一跳穿圈！Joyce好醒目，短短2小時我已經對牠傾心，有衝動抱牠回家，受過訓練的狗仔真的人見人愛。
3.與人共舞
Joyce一向服從性高，跳舞雖不是甚麼高難度表演，但要人狗合拍也非容易，師傅做甚麼動作牠就做甚麼動作，一起跳舞動作極一致，手腳比我更協調。還記得當年學跳舞，第一堂即被老師問：「呢位同學，究竟啲手腳係咪屬於你㗎？」所以Joyce，你已是我的偶像了。
忌廉強項（金毛尋回犬）
狂跨欄
另一隻活潑狗仔是忌廉，溫馴不怕人，個人表演一樣精采，細問才知忌廉曾經好自閉，訓練過後才變得開朗，鄧師傅：「佢以前俾車撞過，之後就變得好怕事，有一段時間完全唔睬人，不過後來經過訓練開始有番自信心，佢至無咁怕人。」
威仔強項（史納莎）
銜啞鈴跨欄
不說不知原來威仔已經9歲，2歲時牠已屢次獲得服從比賽冠軍，鄧師傅：「威仔年紀大，唔好要佢示範咁辛苦。」誰知惹來威仔不滿，不停狂吠全程抗議，最後表演一招咬啞鈴跨欄，一跳即過果然寶刀未老。
Grace強項（混種）
爭跨欄
鄧師傅4隻愛犬尚有一隻未出場，牠就是Grace，3歲的Grace是隻混種狗，極之調皮，鄧師傅話：「佢好活躍，乜都爭餐死，要花多啲時間去訓練。」採訪當日，Suky亦帶愛犬Boogie隨鄧師傅上山，Boogie亦是受訓狗之一，Suky話：「帶隻狗畀專業人士訓練效果會好好多，其實唔單止狗，主人都應該跟埋訓練，否則返到屋企一樣唔識叫狗仔做動作。」說時遲那時快，Grace與Boogie即時爭跨欄，好搞笑。
話你知
「海狗寵物」狗隻訓練導師鄧師傅話：「錫狗就應該訓練狗。」其實唔少主人都會自行教狗仔Shakehand、Sit之類的基本Command，但如想狗仔接受系統訓練，就應報讀課程。鄧師傅舉辦的課程有二，基本課程2小時$1,000，教蹲坐、站立、隨行、握手、伏下及停留基本動作；進階課程1個月$6,000，則教跳手圈、爬行、叫吠、拒食、跳腳、拾物等動作。
查詢：海狗寵物
地址：筲箕灣道233號E舖地下
電話：25670278
