———藝人過去一周出位衣着逐個捉
容祖兒簡約鑽鏈
「最特別就係呢條鑽石手鏈，因為我一向都好少買鑽石，呢條鏈簡直同我一見如故，因為佢設計好簡單，只係用條魚絲將啲鑽石串埋一齊，唔會好成熟，感覺比較young，但又唔會好失禮，好啱我年紀，又可以襯高貴啲嘅衫，不失大方。」
YumikoDIY牛記
「平日出席普通function都會自己襯衫，我鍾意親手DIY改動啲衫，好似呢條牛仔褲我就將佢整爛啲，仲用油漆油上螢光橙，咁就可以襯番我件衫，而且成條褲就變咗獨一無二，喺出面都買唔到啦。至於近期，我就鍾意着adidas呢款adicolor波鞋，因為佢側邊三條間可以換顏色，總共有成七種色，今日我就用咗紅、黃、綠、黑四種色，特別又易襯衫。」
鄧麗欣民族花裙
「我好鍾意呢條裙，其實已經係喺兩年前買，不過之前一直冇機會着過，我本身好鍾意着連身裙，貪佢方便同好容易襯，呢條裙帶啲民族feel，同埋顏色好鮮艷同特別，不過着呢類衫就一定要襯番條粗皮帶，因為如果就咁着，就會好似睡衣咁。」
徐子珊糖紙手袋
「我好鍾意牛仔Pattern嘅嘢，尤其係毛毛質地嘅，我覺得好得意，睇落真係好似動物，因為我頭髮天生曲，如果唔整頭嘅話，戴頂帽就搞掂晒！至於個手袋我都好鍾意，平時我都會買啲得意嘢，呢個袋係用糖紙整成，環保又可愛，每個袋得一款，實唔怕同人撞啦。」
採訪、攝影：駱華齡、黃君怡、胡苑君
