———藝人過去一周出位衣着逐個捉
方力申布鞋翻身
「我平時好少着西裝，多數都係着牛仔褲同Tee，西裝多數係喺隆重場合，好似頒獎禮咁先會着，因為西裝畀人比較成熟穩重嘅感覺，如果想着得fashion，又唔會太老套，就可以着番對布鞋，咁就襯番個場合，又唔會太formal，比較似番個後生仔。」
古巨基型仔皮褸
「自從搵咗Nichol（陳慧琳髮型師）做形象之後，好多時都會喺日本搜羅新衫，有時仲會發掘新牌子。我覺得日本啲牌子好適合我嘅身形，今日我就用N.Hollywood皮鞋嚟襯DiorHomme褲，條褲有少少閃，仲有收身作用，加上着咗件縐縐地嘅皮褸，上下都係皮，互相呼應。」
吳浩康型仔老西
「男仔嘅服飾一向都冇咁多元化，所以好多時都會問番造型師何嘉莉嘅意見，其實買衫唔一定要名牌，只要cutting好，着得舒服就OK，好似今日呢件西裝褸，既可以出席隆重場面，又可以當便服，而且唔一定要襯恤衫、西褲、皮鞋，好似我咁襯T恤、牛仔褲同布鞋都可以好型，唔使吓吓成套老西呀。」
黎諾懿低調平實
「做Artist出席公開場合要做嘢就會着得靚啲，平時就鍾意比較簡單嘅打扮，愈casual愈好，平實嘅便服會舒服啲。有時平民化都好，而且casualwear又唔代表唔好睇或者唔乾淨，只要光鮮就得，所以我買衫都係揀低調啲嗰隻。」
採訪：王連連、駱華齡、楊潔雯
攝影：陳慧安、陳俊強
