鄧麗欣（Stephy）同方力申早前被本報踢爆拍拖歎茶，事敗後展開飛車逃亡，但近排佢哋坐保母車就好安全喇，因為經報道後司機已經變成安全駕駛者，日日開慢車之餘兼再冇違規駕駛。
母性大發
關仁日前就見到Stephy同吳雨霏（Kary）齊齊坐慢車，去麥花臣球場出席活動，當時有位工作人員抱住個趣致得意嘅BB出現，Stephy即時母性大發，攬實BB唔放，同佢又玩又影合照，仲肉緊過BB媽咪，雖然有fans隔住鐵絲網大叫Stephy簽名，但Stephy一味掛住湊細路，冇理fans嗌破喉嚨，直到夠鐘唱歌先至放低BB上台表演。
安撫Fans
點知Stephy一行開，Kary就攝位玩BB，但係好明顯佢唔識湊BB囉，竟然擺咗個錯晒嘅張牙舞爪鬼臉，個BB都唔知有冇被佢嚇親㖭呀。
到Stephy表演後，落台時佢同個男工作人員邊行邊傾，仲主動搭住對方膊頭，跟住再行去鐵絲網前安撫fans，原來Stephy唔單止冧掂方力申，對細路、fans以至工作人員都冧得頭頭是道，認真有辦法。Kary，學嘢喇！