科大校長朱經武喺高等教育同科學界享負盛名，早前八方就講過佢好有機會接李遠哲棒，出任台灣中央研究院院長，不過，前幾日喺肥龍個酒會撞到朱校長，就親耳得知佢已經向台灣說不，即係唔會去寶島啦。
拒中研院邀請
朱校長話件事唔可以再拖，因為好快新院長人選就要拍板出台，所以已經正式覆咗對方，佢唔會接受阿扁邀請。
朱校長心直口快，講完又覺得呢啲嘢唔使講畀人聽，不過，講咗畀八方聽就收唔番。於是八方打蛇隨棍上，問佢係咪準備留喺香港繼續發展？因為係人都知朱經武份約只係續咗一年，明年就約滿。校長好坦白咁話：「我係有啲嘢想做完先走。」至於做乜嘢，佢就欲言又止，隻眼就不停望住企喺八方旁邊嘅財政司司長唐唐，原來佢有啲好重要嘅嘢想當面同唐唐傾。八方同啲行家本來圍住唐唐不放，但係見朱校長咁緊急，只好讓位啦。
朱經武唔講，八方估佢梗係同財爺講佢個大計——就係想喺本年底成立一個世界級嘅「香港高等研究所」，由佢自己做所長，仲準備請七位世界級學者如楊振寧、李遠哲、丁肇中等做顧問，認真巴閉。間世界級嘅研究所大大需財，睇怕朱校長都係同唐唐度水，唔通想請佢做主禮嘉賓要咁秘密咩！
咁呢間要搞十幾年嘅研究所如果搞得掂，朱經武又真係唔使去台灣，而且分分鐘要同台灣競爭㖭。
學生拍爛手掌
朱校長人細細粒，斯文有禮，甚得同學愛戴，𠵱家佢話唔走住，好多人都拍爛手掌叫好，香港跟住呢幾年都鬧校長荒，真係留得一個得一個。當然朱經武話自己好忙，成日要飛返美國，所以佢都未必肯留低，除非真係搞得掂個高等研究所，可能又另作別論。
你估個高檔研究所要幾多錢，大約十至二十億喎，又真係唔簡單喎。
爆料熱線：29290000、27860099
報料傳真：26239278
報料電郵：[email protected]