到外地旅遊計劃遙遙無期，惟有間歇性到就近離島調劑一下。不過次次都係由細去到大的南丫島、長洲、梅窩，感覺開始與出旺角、尖沙嘴、銅鑼灣遊街無異，今個周末索性踩入黃石碼頭乘街渡到人迹罕至的塔門。四面環海的漁村小島全島居民不足100人，山路易行，睇完宏偉叠石再歎肥彭都幫襯的海鮮酒家，最吸引還是可以與牛群作零距離接觸，比平日齋食神戶牛柳、炭燒牛仔骨實在好Feel得多。
記者：陳慧茵
攝影：何家亮
Model：Clairol,Christy@Salvador
人手生曬蝦乾
睇親旅遊書，出碼頭首要任務梗係大口大口吸啖新鮮空氣，照做下你會發覺塔門的空氣夾雜海鮮腥味，原來整個碼頭已被附近居民佔領生曬或擺賣海產，款式包括大眼池、八爪魚、泥鯭等，蹲在地上拆蝦乾的婆婆見筆者好奇，忙不迭介紹，坦白講，婆婆那160蚊斤的蝦乾，比隔鄰檔仔100蚊的內地蝦乾貴6成，不過向附近居民查探過，島上就只有婆婆以人手生曬，無添加不含防腐劑，計落貴得有道理！
只此一間天后寶樓
直行左轉，穿過一列士多再走幾步，名勝天后寶樓已近在眼前，其實天后廟香港起碼有30多間，不過天后寶樓就只此一間。據講塔門的天后古廟位處高台，背山面海，專保佑出遠門謀生的鄉民，每年天后誕，順風順水的海外華僑都會滙款回來添香油，其後天后古廟重修，華僑大力捐助之餘還加建了門前的寶樓以回饋天后娘娘。一場來到當然順道入廟拜神，離開前順道參觀旁邊的關帝廟及水月宮至算「功德圓滿」。沿古廟左方石級路上山頂觀日亭，慢行20分鐘必到，到達山頂就可以吹吹風回回氣，欣賞一望無際的大海，然後趕往下一站──呂字叠石。
跣落山近距離觀塔
依路牌往右走找尋叠石，沿路有靚砌石路超易行，行吓唞吓十幾分鐘後，向下望終於發現海邊大石堆砌成的著名景點──叠石，在此有兩個選擇：沿草坡跣落山再橫跨石灘近距離觀摩，或索性蹺埋雙手遠眺，前者適合勇往直前人士，老幼或平時只顧唱K劈酒手軟腳軟人士則宜選後者。叠石高約6米，由兩塊巨石重叠組成，故又名呂字叠石，近看非常壯觀，由於叠石巨大得遠至大鵬灣亦可望見，所以船家稱此石為「塔」；不遠處有另一著名景點塔門洞，塔門洞其實是塊巨型巖石，高達10餘米，被稱為塔門的「門」，兩者加起來就是「塔門」得名的由來。
漁村態度2:00pm收工
經漁民新村步行回程往碼頭醫肚，邊走邊欣賞舊村風貌，不經不覺便走到碼頭旁，全島唯一的海鮮酒家新漢記；這裏開業20多年，前任港督彭定康、衞奕信等都是座上客，這裏出名海產新鮮味美，老闆娘藍太：「老爺係呢度原居民，以前舖頭由奶奶打理，近幾年老公專心出外工作，舖頭就交畀我，呢度平日都幾靜㗎，嚟食嘅多數係外國人，至於星期日就多本地旅行團入嚟。」難怪閒日下午未夠2點便收鑼，加上晚市免問，好一副漁村態度。
食客有Say
新漢記海鮮酒家（23282428）
地址：塔門海傍街4號
營業時間：11am-1:45pm（一至五）；11am-4pm（六、日及公眾假期）
座位：150個
註：若提早預約，晚市有得傾
網友大讚茶餐廳
出發前上網搜尋，知道塔門的食肆奇少，其中3數間士多兼賣公仔麵等茶餐廳小食，不過數到平價好味之選必推網友大讚的新惠和，這裏超過17年歷史的無冰凍奶茶比金鳳茶餐廳的「發明」還要早，湯公仔麵選用出前一丁而非大光麵，炒粉麵由老闆娘鄧太親自操刀，老闆鄧生父親70年代在塔門經營雜貨舖，舖名「惠和」，80年代轉型開茶餐廳，改名「新惠和」，除遊客外，還吸引到不少村民成為老主顧。
新惠和（27918100）
地址：塔門海傍街3號
營業時間：6:30am-6pm
座位：50個
交通：到達黃石碼頭（平日在西貢乘94巴士，假日則可到鑽石山乘96R）後乘搭街渡半小時到達
