說到近期圈中鬧得熾烈的緋聞男女，吳卓羲與官恩娜的扮反面真拍拖絕對穩佔三甲。官恩娜不但任吳卓羲狂踩，還對戀情三緘其口。當談到「陳世美不認妻」時，更表示體諒陳世美的處境，但她就不能接受男友一腳踏兩船，就像她的初戀男友一樣，曾令官恩娜愛情重傷。 撰文：戴彩煥
現在式：愛得死心塌地
官恩娜（Ella）與吳卓羲的緋聞可謂峯迴路轉，去年初二人合作拍攝無綫劇《酒店風雲》時已被傳撻着，只是，兩位當事人一直矢口否認，齊齊在傳媒面前扮不和，男方為洗脫拍拖之嫌，更毫不留情地在人前狂踩Ella。直至近日，有傳媒拍下吳卓羲接送Ella的照片，才踢爆二人反面互數，原來全是煙幕。
高層拆散鴛鴦
盛傳吳卓羲之所以堅決否認拍拖，是受到無綫高層壓力所致，公司不准他分心拍拖，他便與Ella發展地下情，瞞騙全世界，由於女方愛得死心塌地，所以無論男友在言談間怎樣傷害她，她也默默接受。
對於跟吳卓羲的一段情，Ella始終不想多言：「我唔想回應緋聞，我覺得精神最好focus喺事業上，睇吓每日點improve自己嘅工作表現，做到最好。如果能夠成為一個更有用嘅人，佢身邊出現嘅異性自然會更加好，因為我相信物以類聚，所以，只要我人格品德樣樣做好，日後一定可以結識到真命天子。」
儘管Ella對緋聞不欲多言，但問到她的愛情觀，例如怎樣看地下情時，她卻滔滔不絕：「我覺得冇乜所謂，地下情只係一個terms，keep住啲私人生活，拍拖嘅嘢，唔係一定要畀全世界知道。」
不怕靚仔花心
究竟Ella可願意為愛作出犧牲？「愛情畀到人一種開心嘅感覺，係友情同親情取代唔到，我唔會用犧牲呢個字眼去講愛情，因為愛係雙方面，冇犧牲呢回事，兩個人一齊，應該對對方有正面影響，會包容、容忍對方。我唔害怕去愛、唔驚去付出愛，我係一個好敢去愛嘅人，當我愛一個人嘅時候，冇嘢可以阻到我！」
成功男人背後總有個女人，Ella是否願意當這個背後的女人，默默支持愛郎？「我鍾意有自己嘅character，畀自己一個肯定，今時今日靠自己比較穩陣，我覺得女性可以有family嘅同時，又有自己嘅工作。」
人家總是說靚仔冇本心，擁有一個甚具吸引力的男友，會否覺得欠缺安全感？「咁又未必，呢樣嘢都係因人而定，睇對方點去處理感情，畀唔畀到你信心。當然，如果係靚仔嘅話，自然會面對好多誘惑，睇吓佢把唔把持到嘅啫！我唔會因為男朋友靚仔而終日提心吊膽，我相信好多嘢係講緣份，反而我會諗點樣improve自己，點去keep住佢，令佢留喺自己身邊，成日check住對方，反而會令自己變得好討厭，減低自己嘅吸引力，如果對方真係要離開你，你點提心吊膽都阻止唔到個結果，捉到佢個人，捉唔到佢個心，我唔鍾意迫人。」
「佢終止咗段情」
記得古時包公案中，曾流傳「陳世美不認妻」這故事，內容跟吳卓羲拒認女友事件有點近似。問Ella可有聽過這個民間故事，以及對陳世美有何看法時，她竟哈哈大笑起來：「我都有聽過呢個故事，包青天嘅決定好公正嚴明，不過陳世美雖然係唔啱，但佢都有去終止咗一段情，最可恥係一腳踏兩船、三船嘅男人，一個人點可以一心咁多用！」
攝影：林德雄
服裝：MissSixty
