遠展（035）呢期埋位嘅基金愈積愈多，買定等食大茶飯。2月份時，揸咗遠展而曝光嘅名牌，有VP及德意志，到咗呢個月，又見新晉PMA埋位，揸咗遠展1.02億股或7.1%權益。
VP及德意志呢兩位大孖沙實力點，唔使多講。另一間PMA，呢期埋位嘅股份，其中，渝太地產（075）由PMA權益曝光日到家陣，累升46%，麗國（191）累升64%，而PMA啱啱入股嘅資本策略（497），單日亦升咗13%，PMA無寶不落。
遠展本身亦係有質素嘅股份，中線嚟自澳門及祖國房地產業務，已經可為NAV增值超過3蚊，去到6蚊，遠展絕對唔係亁炒牛河，亦先吸引到基金埋位。再講，買股票，買預期，基金股特色就係追住預期NAV或PE走，遠展追上重秤後NAV6蚊，現價（3.55元）潛在升幅69%。
炒位元堂當炒輪
位元堂（897）上年11月以0.15元1供3後，大股東宏安（1222）權益由原先28%增加到49%，包銷商亦要啃24%。正當大家縮手唔供，位元堂呢劑供股後，唔計包銷商搵人承配部份，公眾持股量變相降到26%，亦變相令位元堂貨源歸邊。又呢期資金有流入三四線股仔迹象，位元堂相對優勝之處，係現價（0.187元）相對供股後NAV0.51元，有高達63%折讓，仲有NAV墊底。對上星期，位元堂持續有過七八球股數成交，開始異動，當炒窩輪心態，刀仔鋸樹仔，會輕鬆啲。
錢雋