杜德偉八五年參加新秀歌唱大賽晉身樂壇，其母張露當年卻誤打誤撞當上歌手。出身貧苦之家，自幼喪父的張露肩負重任，跟母親繡花幫補生計兼照顧弟妹。那時張露唱歌哄弟弟睡覺，被任職電台的鄰居聽到其悅耳歌聲，即力邀她到電台試唱，更推出唱片，紅遍上海。在緣份安排下，她於新加坡演出時認識任職樂師的丈夫，締結良緣！ 採訪：戴彩煥
現年七十四歲的張露，是四、五十年代的紅歌手，經典名曲包括《你真美麗》、《小小羊兒要回家》、《蘋果花》和改編自英文歌《Sevenlonelydays》的《給我一個吻》等等。不過，自八十年代開始，張露最廣為人認識的身份，還是杜德智和杜德偉的母親。
巧遇伯樂
幼子杜德偉憑着參加《第四屆新秀歌唱大賽》進軍樂壇，母親張露當上歌手卻完全屬無心插柳，她說：「我細個嗰陣屋企好窮，爸爸三十三歲過咗身，媽媽要做繡花嚟幫補家計。每日一放學，我就要幫手繡花，雖然冇心機繡，但為咗生活冇法子。十四歲嗰年，有一日我食完飯，一邊抱住細佬一邊唱歌，隔籬屋嘅鄰居咁啱聽到，原來佢喺電台做，佢話我唱歌幾好聽，問我想唔想去電台客串唱歌，我梗係想啦！」
帶仔登台
遇上知音，更有機會到電台唱歌，張露自然一口答應，她說：「我唔知自己成唔成功，所以唔想畀媽媽知住，每日放學後就呃佢話去玩，點知愈唱反應愈好，愈唱時間愈長，媽媽問我做乜嘢成日唔見人，我先講畀佢知我去電台唱歌。」結果張露由電台唱到夜總會，更獲百代招攬灌錄唱片，正式踏上星途。
五七年，張露跟在新加坡演出時認識、在菲律賓出生的西班牙裔樂師OllieDelfino結婚，誕下杜德智和杜德偉兩兄弟。問張露當年錄音或登台時可有帶同囝囝一起，培養他們的唱歌興趣？張露笑說：「咁又冇噃！只係有次我個工人辭咗職，冇人照顧大仔（杜德智），我惟有帶埋佢去夜總會開工，點知個仔一瞓醒就搵媽咪，見我喺台上唱歌，佢就爬上台大叫『媽咪呀！媽咪呀！』真係好好笑！」
義助長者
好學不倦的張露，做歌手時喜歡自己設計唱片造型，買布料學做歌衫；退休後，她仍不斷學習。張露笑說：「我好鍾意學嘢，例如剪頭髮咁，嗰次學完之後，我畀三十蚊個大仔，話幫佢剪頭髮，但大仔好貪靚，我出到五十蚊佢都唔肯畀我剪。」
近年張露還做義工，照顧較她年長的老人家，她說：「以前俾人服侍得多，𠵱家咪服侍番人囉！」
部份圖片提供：張露、陳永業
