經歷了不同時代的《KingKong》，由1933年的活動關節模型，到1976年的真人演繹，及至真人加最新電腦特技的2005年版本，依然有叫座力。而筆者對《KingKong》的印象，只有從公仔箱的甚麼回顧經典節目中，霎眼看過兩個畫面：女主角在金剛手中尖叫同攀上帝國大廈；沒有太多舊作的回憶、拋開新舊對比的枷鎖，純粹以「新鮮人」的心態投入彼得積遜鏡頭下的《KingKong》，感覺是電腦技術堆砌的愛情片，金剛為救女主角而被暴龍圍毆的一段，睇到又肉緊又心噏。
記者：招佩珊
攝影：何家亮
美女與野獸催淚情戲
2005年版本《KingKong》劇本故事根據1933年版本，背景是當時正值經濟大衰退的紐約，講及電影攝製隊於荒島上驚嚇歷險、金剛與女主角的微妙感情；電影掛上《魔戒》導演及其製作班底的Label，戲迷可能捧住睇震撼電腦特技的心態入場，但筆者還是被金剛對女主角的深情吸引住，與恐龍搏鬥、被槍傷淋麻醉藥、被飛機掃射，一切都為咗保護女主角，特別是與暴龍大戰一幕，有隻猩猩為自己連命都唔要，諗落都咪話唔感動。
3大場面金剛武打成龍上身
無可否認，《KingKong》的電腦特技絕對精采，船隻於大浪中顛簸、氣勢陰森磅礡的骷髏島、深谷萬丈的森林等逼真景物，近9成都是經電腦加工的視覺特技效果，即時反應是就算嗌唔出口，免得騷擾其他觀眾，都會有「嘩！」的感覺，但唔算太大驚喜，大抵有《魔戒》珠玉在前，種種視覺上的鬼斧神工，似乎是意料之內，又或者，現今觀眾實在欣賞過太多電腦特技。
大戰暴龍：
女主角逃走時遇上暴龍追襲，金剛及時英雄救美，初時與1隻暴龍單打，後來被3隻圍攻，右手夾住1隻，左手緊握女主角，右腳撐開第2隻，點知被第3隻咬到左手，之後打到半天吊兼且滾落山，以一敵三最終打贏，但打到爆頭流血，筆者睇到握實拳頭，心痛！
踩極唔死：
一段幾分鐘人與恐龍的逃亡戲，明明路窄，恐龍群逼埋一齊，成班人竟然楔到位，一邊跑一邊避，兼且仲可以傾兩句，刻意營造驚險緊張氣氛，呢個位算得上叫做成功，合唔合理又另作別論。
空中搏鬥：
金剛攀上帝國大廈，始終是戲中的高潮所在，戰機發射飛彈，金剛出手力撲，女主角爬上大廈頂，金剛槌打心口咆哮……配合鏡頭轉移，面容特寫，到最後金剛與女主角四目相投，整場戲唔需要一句對白，節奏緊湊，文武戲交接有唞氣位，唔會消化唔到。
必睇Bonus：骷髏島用竹籤拮
本以為片長3小時，有愛情、武打、電腦特技，加埋《魔戒》製作班底，經已抵睇，雙碟版隻Bonus碟，收錄咗彼得積遜OnHost的後期製作日誌，好似日記形式解說製作過程，亦有於美國同澳洲作全球首映片段。睇完套戲，再了解埋背後的視覺特技同音響效果等製作過程，你會更加明白到點解《KingKong》能於今屆奧斯卡獲得最佳視覺效果、最佳混音同最佳音響剪接。當中有一段片展示出1933年拍攝《KingKong》當時所用的大猩猩模型。還有，Bonus碟內更包括有關1933年紐約的黑白歷史記錄片，講及骷髏島的自然歷史片段，加埋又3小時，連煲6個鐘，超抵睇！
落舖首日賣過百
正如上星期碟舖Sales講，今輪新碟肯定《KingKong》惡晒，經典電影重拍，由《魔戒》導演彼得積遜及其班底攝製，或多或少總有期待。《KingKong》有兩個版本，同為雙碟，禮品版另有連獨立編號DVD外盒、DigiPackDVD內盒、《KingKong》字樣陀錶1隻、製作特輯連相集1本同6張明信片。碟場Sales話首日擺上架，雙碟版去貨已過百隻，佢話若然唔係落雨人流少咗，點止呢個數！禮品版雖則銷情唔及雙碟版，但喺舖頭企唔夠5分鐘，就有兩位男客各買一套，話大片GiftSet值得儲。
區碼：3區
發行：年代電影（香港）
聲效：DD5.1
字幕：繁簡體中文、英文、泰文、印尼文
