繼李超人表態支持煲呔連任特首後，賭王何鴻燊噚日出席港大九十五周年生日會時，亦就支持煲呔連任，公開話立場「同李生一樣」，仲話市民一般畀曾蔭權表現係八十分，佢自己就畀足一百分，「能夠搵到個同聲同氣嘅特首，成個市面都唔同晒，經濟好咗、地產好咗、股市亦好咗，市民安居樂業。」
賭王又話，𠵱家香港只係少數人喺度嘈，呢個唔重要；又大讚澳門從未有過大型示威請願，傳媒百分百支持特首何厚鏵依法施政，生意好到不得了，政府收入年年升……嘩，乜世界上真係有咁筍嘅樂土咩？講到八方都心郁郁想移民去澳門。
不過講番轉頭，賭王都好有母校心，舊年承諾捐五億畀港大，噚日港大開生日會，佢老人家又畀面嚟食蛋糕。噚日有成三百幾位嘉賓出席，一同見證切呢個六呎長大蛋糕，為港大賀壽。
爆料熱線：29290000、27860099
報料傳真：26239278
報料電郵：[email protected]